Jonta provinziela se pera da Roma
USP – La Jonta provinziela à (NCUEI) ai 12 de merz fat ora de se paré dal Guviern Talian n cont dla spartizion di 40 milion de euro udui dant per i chemuns ujins. Per chësc y per mo d’autra cuestions uelen se paré dan la Chëurt costituzionela.
I ministri da dant Fitto, Tremonti y Letta ova nvià via n fond per la “Macro-regions” che va a sëida cun la regions autonomes cun l fin de finanzië pruvedimënc per valivé majera defrënzes de strutura ti raions de sëida. Tl cajo dla provinzies de Trënt y Bulsan uel l Guviern de Roma adurvé i 40 milion de euro che tres l’Acurdanza de Milan fova udui dant per nosc chemuns ujins. “Zënza tratatives cun l Guviern a Roma ne pudons nia azeté velch da detel” à dit l presidënt Durnwalder tla cunferënza stampa do la senteda dla Jonta, “ulon nuzé i 40 milion de euro per i 7 chemuns che va a sëida cun l Südtirol y al plù mo i ujins de chisc chemuns”. La se trata de chiche à la cumpetenza de spartì ora i 40 milion de euro.
La Jonta provinziela à nce fat ora de se paré contra cater recursc che l Guviern talian à purtà ite pra la Chëurt costituzionela. La se trata dl’ena de scola a cin dis, la reduzions dla njonta IRAP y IRPEF, l colaudo per camions sëura 3,5 tones y l’unificazion de nceries tla Provinzia y istituzions provinzieles.
as
