Diretives per n'adurvanza nia descriminënta dla rujeneda
USP – Presidënt o presidënta, sculé o sculea: leges provinzieles, urdenanzes y delibres dla Jonta provinziela muessa unì scrites te na rujeneda nia descriminënta. La basa per n’adurvanza valiveda dla rujeneda ie publichedes sun la plata web dl’Aucatura dla Provinzia.
La diretives ie unides lauredes ora dal Ufize Cuestions Linguistiches y ie unides publichedes per tudësch, talian y ti doi idioms ladins dla Provinzia de Bulsan.
“Culaburadësses y culaburadëures di ufizies provinziei che scrij i tesć de lege à daniëura damandà do co che n possa scrì te na maniera nia descriminënta zënza che l test ne devënte rie da liejer o che l cuntenut vede sot” spiega la diretëur de ufize Anette Lenz. L fova gran ëura de mëter dant diretives che debe ndicazions per n adurvanza valiva danter ël y ëila. La diretives che se stiza sun na basa svizra, à per uni rujeneda laurà doi persones.
Danora possen liejer che la diretives ie la fundamënta per l tratamënt linguistich valif tla normes legales, ti tesć aministratifs, ti formuleres y ti tesć generics. Les cuntën ejëmpli cuncrec per l’adurvanza dla formes doples te si variantes defrëntes pra la denuminazions de prufescions, ncëries y funzions, ma sambën nce prupostes per na formulazion de gene neutrela.
La diretives nueves possen abiné tl web, a chësta adres
www.provincia.bz.it/aucatura/argumenc/diretives-adurvanza-nia-descriminenta.asp
Cun la diretives per n'adurvanza nia descriminënta dla rujeneda ti tesć dl’Aministrazion provinziela vëniel metù n drova l articul 8 dla Lege provinziela dl 8 de merz 2010 - lege dla Provinzia Autonoma de Bulsan sun la parificazion y sun l sustëni dl'ëiles y mudazions dla despusizions valëivles.
as
