Majer finanziamënt europeich per l tunel dl Prëner
USP – Nia plu 27%, ma nchin a 40% dl finanziamënt sëurantulerà la Comunità Europea danter l 2014 y 2020 per fé dl tunel dl Prëner. Chësc à l cuordinadëur dl EU, Pat Cox segurà al presidënt dla Provinzia Durnwalder y duc i respunsabli ntan si vijita (NCUEI) ai 20 de merz a Bulsan. L presidënt dla Provinzia à menà do per la proietazion dla trates da ruvé permez al tunel.
L cuordinadëur Cox, la persona de riferimënt per la Talia Mauro Fabris, i presidënc dla BBT-SE Konrad Bergmeiser y Raffaele Zurlo, l diretëur dla proietazions RFI Farncesco Bocchimuzzo: duc se ai ancuntà tl palaz Widmann, pra Durnwalder, per fé l pont dla situazion di lëures, rujené di proscimi vares y dl finanziamënt per miuré la linia dla ferata dl Prëner.
La nutizia prinzipela ie ruveda da Pat Cox che sorissà la priorità da pert de Brüssel per la linia dl Prëner. Aldò de chësta priorità à Cox rujenà de n aumënt dl finanziamënt da pert dla Comunità Europea ti ani 2014 nchin 2020. “La CE sustën dassënn chësc proiet y aumenterà si partezipazion al finanziamënt” à dit Cox che à rujenà de n finanziamënt nchin al 40%.
Dant iel mo da udëi la cunseguënzes dl ressanamënt dla finanzes stateles da pert dl’Austria y dla Talia. “On giapà la nfurmazion che tramedoi stac mantën si mpëni” à dit Cox. Chisc mpënies vëija dant che i lëures per fé l tunel dëssa unì finei via dl 2025 a na maniera che l possa unì nuzà dl 2026. Sibe la Talia che nce l’Austria uel tenì ite chësta dates à dit i presidënc dl BBT – SE Bergmeister y Zurlo.
Deberieda cun l tunel dëssel nce unì fat la trates per ruvé permez al tunel. “Ncuei ei menà do acioche l vënie prësc scumencià a proieté chësta trates, nce sce pona iel bën mo sies-set ani de tëmp per scumencé i lëures” à dit Durnwalder. Dala trata ntëur Bulsan depënd nce l daunì dla stazion de Bulsan. N var plu inant iesen cun la proietazion dla trata danter Pruca y Furtëza che dëssa mo unì fineda chëst ann. Per l adatamënt dla stazion de Pruca dëssel chëst ann unì sëurandat i lëures.
Danter i proiec de comunicazion y nfurmazion dla populazion iesen dut per duta stai a una che l putenziamënt dla linia dl Prëner ie ruveda tan inant che n possa nia plu dé ëuta. Chësc demostra nce i cantieres de Mauls y Furtëza ulache n ie passei dala fasa de esplorazion a la fasa de frabiché la rola ulache passerà la ferates. Da tramedoi pertes iel bele unì giavà ora 17 metri de chël che deventerà l tunel dl Prëner.
as
