Scora / Cultura | 30.03.2012 | 15:09

Duta la scoles autes ladines per l’ena a 5 dis

USP – Do la dezijion dla Jonta provinziela per l’ena de scola a 5 dis y deguna scola de sada, ova i cunsëies de scola da tò la dezijion sun la partizion dl’ëures. Te duta la scoles autes ladines à i cunsëies sën fat ora de sëurantò l’ena a 5 dis. L assessëur provinziel Florian Mussner laudà chësta dezijion tan mpurtanta per garantì la scoles tl daunì.

Cun na maiuranza de 10 sun 14 cunselieres ëssa i cunsëies dla scoles autes pudù mpartì l’ëures de scola sun sies dis al’ena. Ma la maiuranzes ie states per sëurantò la vijion dla sada zënza lezions te duta la scoles autes ladines. Tl Lizeum y Istitut tecnich a la Ila uniral nsci tenì doi iedesc domesdì scola. Ciun dis plu avisa muessa mo unì fat ora. L medemo vel nce per l Istitut tecnich Raetia a Urtijëi. Deguna nuvità ne iel per l Lizeum artistich y Scola prufesciunela a Urtijëi ulache per via dla materies pratiches iel scialdi plu ëura de scola. Sëuraprò ai 5 danmesdis vëniel tlo tenì scola cater domesdis al’ena.
L assessëur provinziel ala scoles ladines rengrazia i cunsëies dla scoles autes per chësta dezijion tan mpurtanta. “Te dut l raion europeich val l trend do l’ena de scola a 5 dis, sce tlo da nëus ëssen pensà autramënter, fossel stat pericul che nosta scoles autes jissa tl daunì ala nia. Chësc ajache sce da nëus fossel scola de sada y ti autri raions nia, se n jissa bonamënter nosc jëuni oradecà” dij Florian Mussner. Cun la dezijion di cunsëies de scola fina via l iter per la ntroduzion dl’ena curta y i respunsabli dla scola possa se dediché ala mëter n droa la partizion nueva.

Tl lizeum linguistich y Istitut tecnich a La Ila ie la votazion per l’ena a 5 dis tumeda ora 9 a 5. De cunseguënza uniral fat doi domesdì des scola. “Nce sce l ie de plu argumënc per tramedoi vijions, son cuntënt dla maiuranza per l’ena curta ajache nsci ons la medema partizion sciche l’elementeres y mesanes dla Val Badia. Chësc ie dessegur n gran aiut per la families” dij l diretëur Albert Videsott.

Na majera descuscion iel nce stat tl Istitut tecnich Raetia a Urtijëi. Nce tlo ie la dezijion per i 5 dis unida a se l dé cun da maiuranza de 9 a 5 ujes. “Son cuntënt dla dezijion tlera che stluj ju la descuscion y śën pudons inò se dediché a d’autri bujëns dla scola” dij l diretëur Bruno Senoner. Per ti unì ancontra ala families an sëurantëut avisa i medemi orars dla scola mesana. L cunsëi de scola à dat pro n’ezezion per i sculeies dla sezion turistica che fej sport agonistich. L’ëures de scola perdudes a jì sun i dlacieres y a mancë doi danmesdì ntan l inviern, puderà unì valivedes ora la sades d’autonn y d’ansciuda. L diretëur fej cont che chësc fé do dl’ëures perdudes pudëssa fé ora feter vint sades danmesdì.

Tl Lizeum d’ert y Scola prufesciunela a Urtijëi iel bele i ultimi 8 ani nia plu unì tenì lezion de sada. A chësta maniera ne iel per chësta doi scoles deguna nuvità. “Ti prim trëi ani de scola vëniel tenì cater iedesc domesdì scola. I sculeies dla cuartes y cuintes ova scumencià aldò dla cumpëida de ëures da dant y à perchël ti proscimi doi ani de scola mo cin iedesc domesdì scola” spiega la diretëura Elisabeth Baur. Dal 2014 inant arà duc chisc sculeies cater domesdis socola.

Orars tla scoles autes ladines

as