Durnwalder pra l cunvëni dla RAI: Südtirol da ejëmpl
USP – La puscibltà de sëurantò l finanziamënt dla trasmiscions tudësces y ladines dla RAI da pert dla Provinzia à trat su gran nteres. Pra l cunvëni dla RAI a Firenze à l presidënt dla provinzia Durnwalder (NCUEI) ai 30 de merz, prejentà la vijions dla Provinzia giatan gran laudes dai reprejentanc dla regions y dla RAI.
Bele tl documënt de fundamënta dla RAI, l cuntrat de servisc danter la Radiotelevijion y l Cunsëi di Ministri, iel scrit che la RAI reporte cie che l suzed tla regions. “Tl Südtirol ne basta chësc nia, nsci che l ie unì fat na regulamentazion sëuraprò che nes segurea la nfurmazion te nosta trëi rujenedes” à dit l presidënt dla Provinzia. No da pont de ududa tecnich, no de urganisazion ne iel unì arjont soluzion otimeles, perchël vëniel cris do pusciblteies nueves.
“Na tela ons abinà cun l’acurdanza de Milan, ulache l ie udù dant 100 milion de euro acioche la Provinzia sëurantole custimënc dl Stat” à spiegà Durnwalder. Bele da scumenciamënt à la Jonta provinziela nce udù dant la finanziamënt dla trasmiscions dla RAI per tudësch y ladin. “Da ntlëuta menons tratatives cun la presidënza dl Cunsëi di ministri y i respunsabli dla RAI, sën sons ruvei a n bon pont” à detlarà l presidënt dla Provinzia. L ie da aspité sun n bënsté dl Minister ala finanzes, che lasce pro la pert finanziera dl’acurdanza. “Chësc bënsté aspitons tla proscima enes” à dit Durnwalder.
L model dl Südtirol de na RAI regiunaliseda à abù gran azetanza a Firenze. Sibe i reprejentanc dla RAI che nce chëi dla regions à tla pruposta dl Südtirol udù n model da ti sté do. “Udron tant che vën a valëi nosc proiet pilot” à dit l presidënt dla Provinzia pra l cunvëni a Firenze.
as
