Desvalì | 10.04.2012 | 15:07

Jonta provinziela: mudazions ala pruposta IMU, culaburazion de svilup y scioldi dala Svizra

USP – Te si senteda da (NCUEI) ai 10 de auril à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce doi pitla mudazions ala pruposta de regulamentazion dla chëuta IMU, l program de culaburazion de svilup per 1,7 milion de euro, cumpensazion finanziera dala Svizra.

Chëuta IMU
Dan che la pruposta de lege dla ndicazions sun la chëuta IMU vënie n vënderdi trateda te Cunsëi provinziel, à la Jonta da pro doi mudazions. I assessëures fej nsci la pruposta ai chemuns de lascé pro la reduzion de 200 euro per l cuatier a jënt che à messù jì a sté te na cësa de paussa y che à l cuatier uet a cësa. Nce per mutons nchin a 26 ani iel bele udù dant na reduzion de 50 euro. La Jonta à śën fat la pruposta che tl cajo de persones defin nvalides, possa la reduzion nce unida fata sëura i 26 ani.

Culaburazion de svilup per 1,7 milion de euro
La Jonta provinziela à dat pro 13 proiec de sensibilisazion per la culaburazion de svilup oradecà, per n custimënt de 220.000 euro. Na cumiscion ova cris ora chisc proiec danter 24 prupostes (per n custimënt de ndut 946.000 euro). Per i proiec de culaburazion valuterà la cumiscion danter 85 prupostes mandedes ite. La Provinzia mët a desposizion 1,7 milion de euro al ann per la culaburazion de svilup. Leprò ruva mo 3 milion de euro da pert dla Region. Vel proiet vën nce fat deberieda cun Trënt y Tirol te na culaburazion Euregio. Do chësc model vëniel tl’Uganda y Burkina Faso bele laurà per 800.000 euro.

Cumpensazion finanziera
Per valivé defrënzes de chëutes per zitadins dl Südtirol che va a lauré tla Svizra, paia la Svizra na na cumpensazion finanziera. La Jonta provinziela à dat pro la medema ndicazions sciche ti ani 2008-09. L se trata de feter 620 pendolares, per chëi che la Svizra paia de ndut 600 milion de euro. Chisc scioldi vën spartì su danter i chemuns nteressei per valivé defrënzes dla chëuta sun l davani.

as