Scumencià i lëures per na ntreda nueva de Bula
USP – Chisc dis vëniel scumencià i lëures per ngrandì y miuré la ncrujeda da Bula sun la streda de pas Pinëi. Aldò di cuntrac iel udù dant che i lëures dure trëi mënsc.
Pra la ncrujeda cun la streda da Bula unirà la streda provinziela de pas Pinëi spusteda n fruz da pert de mont, a na maniera che resté la lerch dessot pert per passé a pe. Davia che l ie bele la luegia ulache fërma la curieres daujin al hotel Albion, uniral nce fat n pitl toch de tretuar ulache la jënt possa aspité la curiera zënza vester al medemo livel sciche i auti.
L ncrujeda da Bula vën dantaldut ngrandì acioche i mesuns de passa 10 metri posse raidé plu saurì. „Cun chësta nvestizion vëniel schivà manovres dla curieres y duta la ncrujeda giapa na miëur visibilità. Chisc doi ponc fej ora truep per la segurëza sun chësta streda“ spiega l assessëur ala stredes Florian Mussner. L ngrandimënt y miuramënt dla ncrujeda cun la streda da Bula fej pert de n cunzet genrel de miuramënt dla streda da Bula nchin tl luech.
I lëures ie unic sëurandai ala firma Goller-Bögl de Persenon che à pità de i fé per 160.700 euro, lascian do de 20,1% l priesc calculà tl proiet. Aldò dl assessëur Mussner iel danter proietazion, esecuzion di lëures y somes de reserva, unì dat pro n custimënt generel de 276.100 euro.
Tla prima pert di lëures uniral fat lerch dessëura pert dla ncrujeda y permò daldò uniral laurà sun la streda de pas Pinëi. Per realisé l proiet dl ing. Michael Pfeifer ne iel nia debujën de śaré la doi stredes. Me te vel pitla fasa di lëures saral debujën de tò ite mesa la larghëza de streda. I auti puderà te chisc mumënc me passé te una direzion al iede. I lëures ie prugramei per trëi mënsc nchin al plu ai prims de lugio. Ntant lëura nce la firma Rella per adaté la streda chemunela.
as
