Lauré su y cunedì la lijëndes ladines: cunferënza stampa ai 17 de auril
USP – Cun la publicazion nueva “Miti ladini delle Dolomiti” vëniel nvià via n proiet editoriel per fé valëi la mpurtanza storich-culturela dla lijëndes ladines y per les dé inant a n majer publich te n cuntest de valuta leterera. L Istitut Ladin Micurà de Rü nvieia al prejentazion, n merdi 17 de auril, dala 09 danmesdì tl palaz Widmann a Bulsan, n prejënza dl assessëur provinziel Mussner.
L Istitut Ladin Micurà de Rü dajerà ora deberieda cun l editëur Palombi de Roma l liber “Miti ladini delle Dolomiti” scrit dal autëur talian Nicola Dal Falco y dala coautëura Ulrike Kindl. Per chësta publicazion vëniel scrit da nuef lijëndes ladines abinedes adum da Karl Felix Wolff, per les fé cunëscer al mond culturel talian te si drët valor.
La lijëndes dl Rëni de Fanes fova ti prim ani dl secul passa unides tëutes su y publichedes do criteries etnologiches na for defin drëc. La scienza etnologica de tradizion tudëscia refudova la “Dolomitensagen” de Wolff. Cun n proiet editoriel se à l Istitut Ladin tëut dant de lauré su l material de Fanes te dut si potenzial a na moda che nce l raion culturel talian posse l tò su y l azeté.
Culaburadëures di media ie nviei ala prejentazion de chësc proiet editoriel
n merdi, 17 de auril 2012
dala 09.00 danmesdì
tl palaz Widmann, streda Crispi 3 a Bulsan.
Ala cunferënza stampa tulerà pert l assessëur provinziel ladin Florian Mussner, l diretëur y l presidënt dl Istitut Ladin Micurà de Rü Leander Moroder y Albert Videsott.
as
