Jonta: mudazions urbanistiches plu scëmples
USP - L iter burocratich-aministratif per mudé la destinazions urbanistiches per raions produtives o raions d’agricultura dëssa unì scurtà y scemplificà. Aldò dla dezijion de mascima che la Jonta provinziela à tëut (NCUEI) ai 16 de auril, dëssel vester mesun arjonjer de tel mudazions te 90 dis, mpede nchin a doi ani.
De n gran var per smëndrì burocrazia à l presidënt dla provinzia Luis Durnwalder rujenà do la senteda dla Jonta. I assessëures à fat la prima pert per scemplifiché la pruzedures y à dat pro na vijion de mascima. Tla proscima senteda uelen dé pro la pruposta de lege da ti prejenté al Cunsëi provinziel. La se trata de mudé raions de vërt agricul te raions de produzion o mudé bosch te na forma de raion vërt sciche pra, pastura o vërt alpin.
La pruzedura scemplificheda che la Jonta provinziela uel purté inant scumencià te chemun. Sce l patron de n grunt uel lascé mudé la destinazion urbanistica dëssa la dumanda unì tacheda ora per diesc dis sun la tofla de chemun. I chindesc dis do ie pona dl’aurela per vel contrapusizions. Pra la proscima senteda dl Cunsëi de chemun muessel pona unì tratà la dumanda de mudazion. Sce la ne vën tlo nia azeteda, fina via la pruzedura.
Sce l Cunsëi de chemun dà na resposta positiva, ruva la dumanda tla cumiscion de cumpetënza. Tl cajo de mudazions “da vërt a vërt” dëssel vester na cumiscion cun reprejentanc dla forestela, dl’agricultura, la defendura dla cuntreda y dl’urbanistica. Sce la mudazion reverda na destinazion “da vërt a grisc”, a n raion de produzion, ruva dla dumanda tla cumiscion urbanistica cun leprò n reprejentant dla forestela y dl’agricultura. Sce la cumiscion cumpetënta azeteda la dumanda cun duc a una, ie nce data pro la mudazion al plann urbanistich. Sce la cumiscion ne à nia duc a una, o sce la ie de contra, muessa la Jonta provinziela tò na dezijion nchin a 30 dis do.
“A chësta maniera possa la pruzedura duré nchin al plu 90 dis y fej sparanië truep tëmp” à dit Durnwalder sorissan de ti unì ancontra a chiche à nteres a fé su firmes y a dé da lëur.
as
