Jonta provinziela: Archif storich y servijes a jënt da oradecà
USP – Te si senteda da (NCUEI) ai 16 de auril à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce la cuestion dl archif dl Ente Nazionale per le Tre Venezie y i servijes soziei per jënt da oradecà cun n cuatier tlo da nëus.
Archif dl Ente Nazionale Tre Venezie a Bulsan
Tl minister dla finanzes a Roma uelen se n destò dl vedl archif dl’Ente Nazionale per le Tre Venezie” che fova unì metù su danter la gran vieres y che ie unì tëut demez tl ann 1970. La Jonta provinziela ulëssa sëurantò feter 4000 documënc che reverda l Südtirol. “Sce chësc ne ie nia mesun, damanderons che i documënc vënie dai inant al Cunsëi di Ministri y che nëus pudon ti cialé” à dit l presidënt dla Provinzia do la senteda dla Jonta. Chësc possa vester de gran nteres storich per stlarì vel cuestions y dantaldut per studië chëi tëmps.
L Ente fova unì metù su per museré ora puscions, ma cun la crisa economica mundiela dl 1929 fovel tl Südtirol unì cumprà su luesc de bacans che ne se la cavova nia plu per pudëi i vënder inant. Ntan i ani de opzion ova l’Ente sëurantëut la puscion de chëi che ova lità de jì demez a viver per i dé o vënder inant.
Segondi cuatieres - servijes soziei
Tl cajo de segondi cuatieres de avëi de jënt da oradecà se prejënta na cuestion sëuraprò. “On udù che l ie for plu jënt da d’autra regions che se stiza sun si segondi cuatieres tlo da nëus per spusté la residënza tlo ca, per pudëi a chësta maniera nce se nuzé de nosc servijes soziei” à dit l presidënt dla Provinzia. Gran pert se tratel de jënt de tëmp che ëssa gën la cures o na luegia te vel cësa de cura. Per chisc servijes muessen avëi cin ani la residënza tl Südtirol. Durnwalder à sorissà che n uel bën judé la jënt, “ma sce zachei à n segondo cuatier tl Südtirol, ne iel nia de na situazion de miseria”. La Jonta provinziela ejaminea la pusciblteies per regulamenté i servijes soziei per jënt che ruva adalerch se stizan sun n segondo cuatier.
as
