Comisciun por la contrada azeta le proiet de segurëza a Al Plan
USP - La II Comisciun provinziala por la sconanza dla contrada, cun a će l’arch. Adriano Oggiano, à azetè tla sentada di 24 d’aurì dl 2012 n proiet de segurëza a Al Plan de Mareo.
Le Comun de Mareo ô fà n intervënt preventif por mëte al sigü la strada, la pista da paslunch, le bosch y la pastöra dlungia la "Roa dles Cialdires" a Al Plan, tl raiun dl Parch Natural Fanes-Senes-Braies.
Al é preodü da tó y jì 10.000 metri cubics de material. La spersa de prelevamënt dl material y l'azès messarà gnì fat fora a öna cun l'Ofize provinzial Parcs naturai y la staziun forestala competënta. Do che an arà portè demez le material messarà l'azès gnì arjigné ca sciöche al ê denant y le terac messarà gnì modelè a na moda naturala.
usp
