Parlamenteres dla CEI mpera a cunëscer la situazion ladina
USP – Per mparé a cunëscer la situazion dla populazion ladina ie delegazions parlamenteres de 18 paejes dl’Europa ruvedes adalerch a Urtijëi. N ucajion dl cunvëni dla Central Eurpean Initiative (CEI) a Bulsan à l assessëur provinziel Florian Mussner (INIER) n vënderdi ai 27 da auril nvià a na sëira ladina.
Tl’ancunteda a Urtijëi à l assessëur provinziel ladin prejentà ciuna che ie la identità ladina te n cuntest de vester autramënter permez ala maiuranza. Sciche element zentrel dla mendranza al prejentà la scola paritetica ladina che pieta a nosta jënt na basa plurilinguistica. Just la rujenedes ie la streda dl’Europa per mantenì la pesc y per lascé pro n cuntat danter i populi - Florian Musnser à dit de udëi n spirt europeich tla identità ladina.
Feter trënta reprejentanc parlamenteres à priejà dassënn la situazion di ladins sciche mendranza te na mendranza, dantaprima per l nseniamënt de plu rujenedes. Sciche pertes zentreles dl mpëni da pert dl’Aministrazion provinziela per i ladins à Mussner nia me rujenà dla scola, ma nce dl sustëni per la cultura ladina.
Che i ladins à i dërc dal didancuei ne ie nia na arjonta automatica, à dit Mussner, sorissan che i ne ie nia unic numinei tl tratat de Paris, ma che l guviern a Roma y chël a Bulsan à purtà inant na politica per la populazion ladina.
L cunvëni dla CEI, n vënderdi y sada, 27 y 28 de auril a Bulsan ie dedicà al Autonomia sciche scunanza dla mendranzes y dl’arpejon culturela per la pesc danter i populi. Per chësta rejon iel nce stat mesun mëter a jì l cunvëni tl Südtirol y nia tla capitela a Roma. Majera pert di parlamenteres vën da paejes dl’Europa urientela, la Talia y l’Austria ie i sëui doi paejes dl’Europa uzidentela cumëmbri dla CEI. L cunvëni a Bulsan ie unì metù a jì su scumenciadiva de Oskar Peterlini che ie presidënt dla cumiscion culturela. De plu sun la Central Eurpean Initiative nce sun la plates www.cei.int.
Paejes cumëmbri dla CEI
Albania, Austria, Belarus, Bosnia y Herzegovina, Bulgaria, Croatia, Czech Republic, Hungary, Italy, Macedonia, Moldova, Montenegro, Poland, Romania, Slovakia, Slovenia, Sebia, Ukraine.
as
Galaria dales fotografies
foto USP/Stuffer.
