La Junta provinziala azeta le majer costimënt por la strada da Pidrô
USP – La preparaziun tecnica por comedé n tòch de strada danter Pidrô y La Val se à damanè cotan de analises y incuntades. Ultimamënter él ćiamò rové laûrs laprò y intratan s’àl inće mudé i prisc. Por chëstes rajuns à la Junta provinziala dè pro sön proposta dl assessur Mussner le costimënt nü de 2.072.544 euro.
Danter Pidrô y la fraziun Lé fajarà la Provinzia laûrs por slarié la strada y miorè les otes. Sön na lunghëza de 425 metri gnaràl inće fat n marciapîsc. “Ara se trata chilò de n tòch de strada dër prigorus por la jënt che va a pé. Cun chisc laûrs podunse pité plü segurëza por chi che va a pé y inće chi che va cun l’auto à na maiù visibilité” spliga l’assessur Florian Mussner.
La proietaziun ê gnüda fata sön la basa de n proiet de mascima che le Comun da La Val â lascè fà. Inlaôta s’ân tignì ai prisc dl 2008, mo de jenà de chësc ann à la Junta provinziala dè pro prisc nüs y insciö àl inće messü gnì adatè la calcolaziun por la strada da Pidrô. Le secundo punt che à portè a n majer costimënt é na ligna de laûrs che é rovà laprò. Analises geologiches à mostrè sö le bojëgn de mëte al sigü le marciapîsc da na roa dessura: “Chilò gnaràl metü rëis de fer” spliga l’injinier Gustav Mischì. Tla calcolaziun nöia dl costimënt él inće gnü tut en conscidraziun che ara va debojëgn da tachè ite i ros dal gas y da mëte jö perses de termo. Aladô dla relaziun geologica él gnü calcolè mosöres por mëte al sigü le cantier tratan che al vëgn ćiavè y por podëi lascè passè i auti tratan i laûrs. Le marciapîsc che gnarà fat sön la man dërta da jì sö pert gnarà realisé de 15 metri plü lunch a na manira da rové ćina pro le punt por arjunje insciö plü saurì la fermada dla coriera. Por chi che va a pé gnaràl inće fat n sotpassaje dlungia le tablé dala pert dessot a strada. Cun n elemënt de cuntrapëis saràl aladô dles ultimes mudaziuns poscibl da lascè demez mürs de sostëgn de 7-8 metri che foss scenò stà da odëi dal paîsc jö. Ćiamò d’atri laûrs é rovà laprò y reverda n tòch dla canalisaziun che mëss gnì spostè, la iluminaziun publica che mëss gnì fata danü y ros che mëss gnì metüs jö. A chësta manira é le costimënt general jü sö de feter le 40% rovan insciö a 2.072.544 euro. Sön proposta dl assessur Florian Mussner à la Junta provinziala fat fora da azetè la investiziun por chësc proiet.
La strada da Pidrô tl vers de La Val à sön so pröm tòch na pendënza mesana de 8,6%; cun i laûrs proietà gnaràra splanada y slariada a 5,5 metri. Sön le tòch de strada en chestiun él inće n punt de 14 metri. Le marciapîsc gnarà fat plü alt pormez ala strada por despartì ćiamò deplü la lerch resservada ai mesi motorisà y chëra por la jënt che va a pé. Por podëi passè inće plü saurì cun bagheli arà le marciapîsc na larghëza de 1,5 metri.
as
