Lità l Cunsëi scolastich provinziel nuef
USP - La cumiscion provinziela de vela à (INIER) ai 2 de mei finà via la pruzedures per njenià l Cunsëi scolastich provinziela nuef. I candidac litei unirà numinei ufizialmënter cun delibra dla Jonta provinziela y scumencerà si atività per l proscimo ann de scola.
L Cunsëi scolastich provinziel nuef tenirà si senteda costituënta de setëmber y meterà nsci man si atività per i proscimi cater ani de scola. Te chësc cunsëi iel reprejentà l mond scolastich de duta trëi grupes de rujeneda.
La Scola ladina à de ndut 8 cumëmbri. L assesssëur ladin Florian Mussner y l ntendënt Roland Verra ie cumëmbri de dërt. A reprejenté i diretëures y ispetëures ie unida liteda Edith Ploner. I nsenianc ladins à trëi reprejentanc: Walter Pescosta (scoles autes), Michaela Vittur (scoles elementeres) y Uberto Valentini (scoles mesanes). I genitores dla scoles ladines ie reprejentei da Ivana Peristi y i sculeies da Romeo Costa.
Tla sezion ladina dl Cunsëi scolastich iel mo 8 reprejentanc sëuraprò, che ne fej nia pert dl plenum. Tlo iel unì lità Bruno Senoner (diretëur), Rosmarie Senoner (scolines), Verena Niederegger (nsenianc de religion), Andreas Tomasini (scola prufesciunela), Heinrich Videsott (Chemuns), Evelin Moroder (economia y mond dl lëur), Paul Videsott (Università) y Andrea Tardivo (cësa per i studënc).
Juntà pro la listes de dut l Cunsëi scolastich provinziel y i resultac de vela.
as
