Lueges dai auti, trasport y assistënza per l’ancunteda di Alpini
USP – 250.000 persones, 2.000 curieres, 2.500 camper, 15.000 nchin 20.000 auti: cie che i esperc dla Provinzia se aspieta per l’ancunteda di Alpini dai 11 ai 13 de mei a Bulsan fej mprescion. Aldò ie nce stat l duvier de tò pruvedimënc sciche l abiné la lerch per i auti, rafurzé l trasport publich y garantì l’assistënza sanitera.
Per ti vester al gran avenimënt dl’ancunteda di Alpini à la Jonta provinziela bele da mënsc nciarià la prutezion zevila de coordiné i duvieres da pert dla Provinzia. Pra la prejentazion di servijes à l diretëur Hansperter Staffler rujenà de cin grupes de lëur che se dedichea a de majeri ciamps problematics. Chisc ie l muvimënt sun stredes, plu frecuënza tl trasport publich n cont de curieres y ferates, l’assistënza sanitera, l ntervënt de meldefuech pra la tendes y palestres, ma nce de majera prestazions dla rë per i fonins tla zità de Bulsan.
Una dla majera problematiches ie la cundizions acioche i partezipanc dl’ancunteda possa ruvé te zità. Chësc ne ie nia scëmpl davia che n se aspieta da 15.000 a 20.000 auti, 2.500 camper y passa 2.000 curieres tl Südtirol. Sce n metëssa duta chësta curieres te na lingia, unissel ora na coda de 30 chilometri. Leprò iel da tenì cont che duc unirà dal sud de vieres de Bulsan, tulan l’autostreda.
Per la curieres an udù dant de les fé unì ora dl’autostreda a Bulsan Sud y de les lascé ju tla plazes dl raion. Canche chëstes sarà plëines, messerà la curieres lascé ora la jënt y pona jì sun na plaza ti raions dl Unterland, Maran y Persenon.
N generel dëssa duc i Alpini che ne ruva nia adalerch cun curieres lascé si auto ora de zità y ruvé tl zënter cun la curieres publiches o la ferata. L trasport publich ie unì rafurzà dassënn sibe te zità, che shuttle da Salurn, Auer, Maran y Persenon. Ntan l fin dl’ena furnerà la ferata aldò dl orar da di da lëur. Cun curieres y ferates possel un i ëura unì menà nchin a 8.500 persones a Bulsan. La curieres straurdineres possa unì nuzedes debant, per l trasport de linia iel unì njenià na Alpini-Mobilcad da 15 euro.
Per l’assistënza sanitera iel unì njenià trëi spediei ala lergia y na lingia de stazions de prim aiut te zità. I spediei a Bulsan y Maran ie anjeniei per la situazion particulera. Sëuraprò ai culaburadëures saniteres de zënza, saral n ucajion dl’ancunteda di Alpini mo 350 culaburadëures che juda pea.
as
