Lëures publics: regules nueves per firmes da tlo
USP – Sciche “n gran var inant“ valuteda l assessëur provinziel Florian Mussner l recurs dla lege per scrì ora lëures da pert dl Guviern a Roma. “Chësc pudëssa suné sciche n paradox, ma la se trata che a Roma iel unì azetà i ponc zentrei de nosta lege zënza ubiezion, chëla che ti vën ancontra ala firmes da tlo” dij l assessëur ai lëures publics.
L recurs da pert de Roma reverda doi particuleres dla lege provinziela n cont dl dé inant ncëries a d’autra firmes. “Nëus ulan scrì dant che i lëures possa unì dai inant ala medema cundizions che nëus piton, ma chësc vën a Roma udù sciche n se mescedé ite tl marciadé danter privac” spiega Mussner. Mpurtant ie che la seves zentreles dla lege per scrì ora lëures ie restedes mpé nce do l recurs da pert dl Guviern talian, dantaprima la puscibltà de nia messëi sëurandé duc i lëures deberieda ma spartì do mestieres. “A chësta maniera ti ruva bonamënter permez la firmes da tlo, ajache per la gran firmes da oradecà ne se paië nia drë a fé pea de pitli cuncorsc” dij l assessëur.
L spartì de lëures publics ie a chësta maniera cunzedù a livel giuridich, scebën che n muessa respeté la regules. Ncëries che va sëura la sëida europea de 5 milion de euro, possa unì spartides te mëndra ncëries, ma una pert muessa mpomo unì scrita ora a livel europeich. “Amanca 80 percënt de chësta somes muessa unì scrit ora a livel europeich y nchin a 20 percënt ne muessa chësc nia” dij Mussner. Na segonda cundizion ie che l’aministrazion che scrij ora i lëures ne daussa avëi degun svantaje cun la spartizion dla ncëria. “Chësc ie per nëus na cundizion logica ajache messon pu ti respuender a chiche paia la chëutes y ne pudon nia ti fé pesé n majer custimënt” spiega l assessëur.
N generel ne vëniel nia me udù n vantaje per la firmes da tlo tres la spartizion dla ncëries. Canche la se trata de lëures de na gran cumplessità tecnica, iel nce per l’aministrazions de utl a pudëi i sëurandé spartì su. Nascila possel unì cialà do miec chiche fej ciun lëures.
as
