Cumiscion per la cuntreda azeteda trëi proiec te Gherdëina
USP – Danter i proiec che la Segonda cumiscion provinziela per la scunanza dla cuntreda à dat prò te si senteda dl 5 de juni iel nce chël per slargë l purtoi dai schi Panorama te Sëlva, de miuré l purtoi dai schi de Resciesa a Urtijëi y per na luminazion publica sun Mont de Sëuc.
L purtoi dai schi “Panorama” sun Dantercëpies possa unì adatà y slargià. La cumiscion provinziela à azetà l proiet sun na spersa de 4300 metri cuadrac. I lëures muessa unì fai deberieda cun la stazion dla forestela de Sëlva.
Nce l proiet de miuré l purtoi dai schi de Resciesa, tl Chemun de Urtijëi, ie unì azetà dala cumiscion per la cuntreda. Tlo iel udù dant lëures te cin lueges che fej ora de ndut 3500 metri cuadrac. L purtoi ie daujin ala sëida cun l parch naturel Puez-Odles y cun l biotop Palusc Col Cianacei. I esperc, cun si presidënt Adriano Oggiano se à damandà che doi i lëures vëniel, deberieda cun l Ufize Ambient, inò fat crëscer ite l rone dl purtoi. Sëuraprò se à la cumiscion nce damandà che l vënie anjenià na luegia de amaca 50 metri cuadrac che pea su l’eghes dl biotop dessëura. I lëures muessa unì fai deberieda cun la stazion forestela. Leprò muessa la sozietà dl lift de Resciesa nce paië na cauzion de 10.000 euro.
Danter la stazion dla furnadoia Sëuc – Mont Sëuc y la plaza dai auti Kompatsch possel unì fat na luminazion publica. La Segonda cumiscion provinziela per la scunanza dla cuntreda à azetà chësc proiet dl Chemun da Ciastel a cundizion che la luminazion vënie me fata iló ulache l ie bele nfrastrutures y frabicac. L ne possa nia unì tucà raions vërc.
as
