Presentaziun de materiai de alfabetisaziun nüs ai 13 y 14 de jügn
USP - „Alfabetier“ é na racoiüda de materiai didatics por l’alfabetisaziun te de plü lingac tles prömes tlasses dla scora elementara, dà fora dal Departimënt Educaziun y Cultura Ladina, Inovaziun y consulënza, por promöie tla medema mosöra le lingaz dla uma y le secundo/terzo lingaz. Ai 13 y 14 de jügn gnaràl fat na presentaziun por le personal insegnant y dötes les porsones interessades a San Martin y a Urtijëi.
L’ofize provinzial Inovaziun y consulënza por les scores ladines à laurè fora material didatich nü por l’alfabetisaziun te de plü lingac, por ti jì adincuntra ai bojëgns dles scolares y di scolars, che crësc sö cun de plü lingac te familia y tla sozieté. A chësta manira él gnü metü a jì te dötes les scores elementares dles localitês ladines n proiet de alfabetisaziun sistematica te de plü lingac anuzan les competënzes dles scolares y di scolars por i stimolé deplü.
Bele da plü agn incà prô n valgönes maestres y n valgügn maestri da adatè so insegnamënt ala situaziun eterogena dles tlasses y à insciö svilupé materiai inovatifs por imparè da scrì y da lì. Chëstes idees porvades fora ti agn passà y i consëis pratics dles maestres é śëgn gnüs coiüs adöm, laurà fora y publicà dal ofize Inovaziun y consulënza (ex Istitut Pedagogich Ladin).
Al podarà insciö gnì laurè do n conzet de alfabetisaziun coordiné y multilingual, olache les mitans y i mituns impara tl medemo tëmp da scrì y da lì tl lingaz dla uma y ti atri dui lingac.
La racoiüda de materiai didatics destinà al’alfabetisaziun te de plü lingac „alfabetier“ gnarà presentada sides tla Val Badia che te Gherdëna.
En mercui, ai 13.06.2012
dales 15.00 tl salf dl Istitut "Micurà de Rü"a San Martin de Tor y
en jöbia, ai 14.06.2012 dales 14.30 tla scora elementara a Urtijëi.
La presentaziun gnarà fata dal Intendënt dles scores ladines Roland Verra adöm cun l’Ispeturia Rosmarie Crazzolara y les coordinadësses dl proiet Veronica Rubatscher y Claudia Rubatscher. Ala presentaziun tolarà pert inće l’assessur provinzial por les scores ladines Florian Mussner.
I colaboradus di media é dër bel invià ales presentaziuns y da lascè alsavëi i contignüs.
as
