Raion sa Bula tratà dala Cunsulta provinziela per la cultura dl frabiché y cuntreda
USP – N raion da frabiché cun nfrastrutures publiches sa Bula ie unì tratà tla senteda dla Cunsulta provinziela per la cultura dl frabiché y cuntreda. I cumëmbri nueves de chësta cunsulta ie de merz unic numinei dala Jonta provinziela.
Aldò dl diretëur de ufize Adriano Oggiano ie l prim di de cunsultazions jit drët bën: l ie stat n bon tlima de lëur, nce sce n na à nia pudù traté duta la prupostes. Da pert di chemuns, di proietanc y di patrons de cantier vëniel, aldò de Oggiano, sciazà plu y plu l barat de ideies che ie daniëura drët a puntin y ogetif: “A chësta maniera possen me miuré la cualità di proiec”.
Cumëmbri nueves dl cunsulta per la cultura dl frabiché y cuntreda ie l’architeta Sonja Gasparin de Villach, l architet Sergio Pascolo de Unieja y l architet Dieter Jüngling de Coira (Chur) che fova bele dant cumëmber y porta cuntinuità tl lëur.
Tl Chemun da Ciastel vëniel tres n cuntrat urbanistich udù dant n raion da frabiché cun nfrastrutures publics sa Bula, daujin a la dlieja y curtina. Mpede la calonia dëssel unì fat na cësa per la lies cun doi cëses da cuatieres y leprò na plaza de dlieja. Chësc proiet fova bele unì cialà tres dai cumëmbri da dant dla cunsulta. Tla senteda cun i cumëmbri nueves iel unì cunstatà che la prupostes ie ntant unides ntegredes tla verscion atualiseda dl proiet. La cunsulta cunsieia al Chemun de nterpreté l’architetura tipica dl post aldò di tëmps. Pra chësta senteda fovel nce l ambolt da Ciastel Andreas Colli, cumëmbri dla cumiscion da frabiché, patron y proietant cun leprò dla diretëura dl ufize provinziel de raion Annalisa Ziernhöld.
Nfurmazion sëuraprò dla Cunsulta provinziela per la cultura dl frabiché y cuntreda nce tres internet sot a www.provinz.bz.it/natur/themen/baukultur-landschaft-landesbeirat.asp
as
