Pra l’Europeada uniral nce rujenà ladin
USP - Che l sport possa cuntribuì a valorisé la mendranzes de rujeneda demostra l campionat europeich de juech al palé “Europeada”. Per l prim iede fajerà dai 16 ai 24 de juni nce pea na scuadra ladina. Chësta scuadra interladina che ie unida prejenteda (INIER) ai 10 de juni tl Istitut Ladin a S. Martin, pieta sëuraprò na bona ucajion de cuntat danter la jënt dla cin valedes ladines dla Dolomites. Sciche sustenidëur dla scuadra, à l assessëur Florian Mussner sorissà l valor di cuntac interladins che vën curei tres l juech al palé.
L campionat Europeada a Lausitz (Sachsen) ti Paejes Tudësc pieta sëuraprò ai juesc al palé, nce n program ntëurvia dedicà al barat y ala cultures. Nfati vëniel dedicà n di ntier al cuntat interculturel ulache uni una dla mendranzes autoctones dla FUEV che fej pea l campionat, possa se prejenté. Ai 20 de juni saral l Istitut Ladin Micurà de Rü à prejenté la mendranza ladina se nuzan nce la mostra itineranta Viac tla Ladinia.
Pra la prejentazion dla scuadra à San Martin an sentì la fiëura de fé pea l’Europeada y de fé na bela paruda per la valedes ladines. Nsci iel unì priejà chësta scumenciadiva de culaburazion danter la valedes dla Dolomites. “Sëides sun la chertes geografiches ne muessa nia vester tl cë dla persones. A chiche ne à nia sëides persuneles se gëura la protes dla culaburazion” à dit l assessëur Florian Mussner che à pensà mo n var inant y à nunzià che l fossa bel sce l’Europeada pudëssa nce n ie de unì jugheda tla valedes ladines.
Pratrick Dapunt se à sëurantëut de mené la scuadra sciche alenadëur. I 17 jugadëures dala valedes ladines, che ne se cunesciova dant nia duc danter ëi, à ntant bele fat de plu alenamënc y juega ntant drët bën deberieda. Dla coordinazion dla scuadra ladina se à sëurantëut Giorgio Costabiei. L’Assessorat provinziel ladin à dat n sustëni ala reprejentanza interladina te chësta ucajion.
De ndut saral 20 mendranzes de 13 stac, ghesć di Sorbesc per fé pea l campionat Europeada. La scuadra ladina fajerà si prim juech de campionat n dumënia ai 17 de juni (dala 15.00) a Neschwitz contra i Nordfriesen. Lunesc ai 18 jugherai contra i croac dla Serbia, n merdi ai 19 contra i turcs dl Griechenland. I juesc de cherc de finale nchin la finale unirà jughei danter l 21 y 23 de juni. L ann passà, pra la prima edizion ti Grijons ova venciù la scuadra dl Südtirol.
Nfurmazions sun l campionat de juech al palé dla mendranzes nce sun www.europeada.eu
Cëla la fotos sun www.facebook.com/pages/Jonta-dla-Provinzia-de-Bulsan/175038282506579
Scuadra ladina per l’Europeada 2012
Adami Paolo da Fodom (ACD Val Badia)
Bernard Manuel de Fascia (Fassa Calcio)
Bernardi Julian da La Ila , (ACD Val Badia)
Bonani Maurizio, de Fascia (Fassa Calcio)
Cincelli Nicolò de Fascia (Fassa Calcio)
Debertol Cristoforo de Fascia (Fassa Calcio)
Erlacher Armin da Antermeia (ACD Val Badia)
Feichter Elmar da Al Plan (Mareo)
Irsara Andrea da San Martin de Tor (ACD Val Badia)
Kantioler Sepl da La Val (US La Val)
Kostner Aron de S. Cristina (FC Gherdëina)
Mittermair Peter de Sëlva (Bozner FC)
Palfrader Roman de Al Plan (SSV Bruneck)
Pompanin Alberto da Cortina (Cortina Calcio)
Riffeser Guido de Sëlva (FC Gherdëina)
Rubatscher Florian da La Val (US La Val)
Stampfer Matthiasda La Ila (ACD Val Badia)
Dapunt Patrick-Alenadù
Winkler Markus-2 Alenadù
Giorgio Costabiei-Coordinadù
Costner Klaus-Acompagnadù
Ploner Gerhard-Acompagnadù
Moling Marco-Acompagnadù
as
