Diego Perathoner, reprejentanza ladina tla mostra Panorama
USP - Pra la gran mostra de ert nueva “Panorama 4” a Franzensfeste iel nce unì nvià cater artisc’ ladins. Aron Demetz y Gerhard Demetz ie ejëmpli di artisć ladins che à bele fat streda. Fabian Feichter y Diego Perathoner ie pert de na generazion jëuna che porta na vëta nueva tla maniera de fé ert ti luesc ladins. Tla sëuravijion dl’ert atuela tl Südtirol iel da ndut da udëi 33 posizions de ert contemporanea. – Na prejentazion de Diego Perathoner
Diego Perathoner, nasciù dl 1981, fej pert de chëla generazion jëuna de artisć de Gherdëina che prova cun forza a renuvé i lingac espressifs, ma zënza neghé si ravises artistiches tla cuna nia saurida dla scultura figurativa tradiziunela.
Perathoner usservea cun uedl daviert la realtà ntëur ël via, dalonc o daujin che la sibe, y l se cunfruntea daniëura cun i mecanisms che guvernea l mond. La natura da homo curiosus se spidlea defin te si produzion artistica, carateriseda da na cerduda de argumënc, formes y materiai defrënc, suvënz nce stersc y defin nia cunvenziunei. Mitel, lën, polistirol, rejes, scipa ma monce tieres morc devënta nsci esprescion dla Weltanschauung uriginela y alternativa dl artist che mudelea y ti dà forma ala materia cun savëi istintif.
La scultures de Perathoner, suvënz criptiches y ntortes sciche i tòc de n bur sëmi, se sënta ite te ambientazions studiedes aposta, deventan nsci n grum de microcosms, metafores iconiches di mpulsc arcaics che scassa l macrocosm dla persona. La scultura devënta nsci critica soziela y spiedl che mostra su i cumpurtamënc de na raza aruganta, dassënn svilupeda ma che ne ti ie mpo nia al subconsce che guvernea dut cant.
Chësta ie, povester, una dla tleves per liejer l’opra metuda ora a Panorama 4: mudiei de berches da viera te n licuid blanch te doi gratons: n cheder poetich y sureél per nes recurdé, sce n cajo che l fossa de bujën, l’assurdità dla viulënza, trajan tl ridicul a na maniera zinica ch’la primitiva „cuntinuazion dla pulitica cun d’autri mesuns“, coche la viera ie unida descrita dal generel y teorich militer Carl von Clausewitz.
(prejentazion dl curadëur ladin de Panorama, Tobia Moroder)
Diego Perathoner (* 1981), chersciù su a Urtijëi. Do avëi fat la Scola Prufesciunela te Gherdëina se al scrit ite tl’Academia d’Ert de München che l à stlut ju tl 2012 cun diplom. L viv y lëura danter Urtijëi y München.
Mostres y proiec plu mpurtanc
2011 Jahresausstellung, Akademie der Bildenden Künste, Monaco
2010 Ultima Vista, Messner Mountain Museum, Monte Rite, Cibiana di Cadore
2008 Schwarzarbeit, Circolo per l’arte e la cultura, Ortisei
2007 Wellness, Parallelevent Manifesta 7, Ortisei
2007 Jopes, Akademiegalerie Monaco (solo)
2006 Start, Prismagalerie, Südtiroler Künstlerbund, Bolzano
Panorama 4
nchin ai 30 setëmber 2012
Furtëza a Franzensfeste
merdi 11.00 – 21.00, mierculdi – dumënia 11.00 – 17.00
d’agost nchin la 18.00
www.provinzia.bz.it/panorama
Articul dla mostra Panorama cun video y ntervistes a
www.provinzia.bz.it/usp-ladin/285.asp?aktuelles_action=4&aktuelles_article_id=396645
usp
