Gestion dl furnel dal refudam: Jonta provinziela uel ruvé a una cun i chemuns
USP – L furnel dal refudam nuef a Bulsan ie la resposta dla Jonta provinziela a un di majeri bujëns di chemuns: chël de tò y jì l refudam. I lëures ie bele a n bon pont y n auter ann dëssel bele jì n funzion, ma sën ne iel nia plu tler chi che dëssa sëurantò chësc mplant. La Jonta provinziela à (NCUEI) ai 16 de lugio fat ora de lascé lauré ora na pruposta.
Na grupa de lëur cun i diretëures di dipartimënc per lëures publics y Natura y Cuntreda, Josef March y Flavio Ruffini, l diretëur dl ufize legal Stephan Beikircher y l presidënt dl assoziazion di chemuns Arno Komptascher dëssa lauré ora na pruposta de co che i chemuns dëssa sëurantò l furnel dal refudam che la Provinzia frabica per ëi. La Provinzia ie tl lëur de frabiché chësc mplant sun ncëria di chemuns per n custimënt de feter 130 milion de euro.
Do che se à mudà la situazion di aiuc publics per mené n tel mplant, semea che i chemuns ne uel sën nia plu l sëurantò. “Sce i chemuns ne l sëurantol nia, pona pudëssa la Provinzia nce l fité ai chemuns per paië ju l custimënt” à dit Luis Durnwalder tla cunferënza stampa do la senteda dla Jonta. Ma la ulentà dla Jonta provinziela ie mo for che i chemuns sëurantole l mplant y tol pona nstësc la dezijion co l mené.
Danora ova la Provinzia sëurantëut de frabiché ajache l custimënt fova massa grant per i chemuns. Ëi l ëssa pona sëurantëut finà y l ëssa paià ju n puech al iede.
Sëuraprò ala cuestion dla gestion dëssel nce unì stlarì miec co nuzé l ciaut dl furnel y co che l ciaut dëssa unì menà nchin tl spedel de Bulsan y tl raion de Firmian.
La grupa de lëur dëssa purté dant si pruposta nchin a mez setëmber.
as
Landeshauptmann Durnwalder erklärt die nächsten Schritte hinsichtlich der Müllverwertungsanlage in Bozen
- Scarica il file audio 854 kb
