Cumité dl’arpejon Unesco azetea la relazion positiva dla Dolomites
USP - Che la gestion dla Dolomites sciche arpejon mundiela Unesco ie sun la drëta streda desmostra l cumité Unesco che à azetà la relazion positiva do la vijita de cuntrol de utober. Chësta relazion tol nce ite i pruvedimënc che ie unic tëuc per stravardé la Dolomites.
Chiche possa se tlamé arpejon mundiela Unesco, se tol nce su la ncëria de tenì ite criteries sciorfes che vën for inò cialei do. Sce i cuntroi mostra su na valutazion negativa possel nce unì tëut demez l titul. Chësc pericul ne ie per la Dolomites ntant nia plu. Tla relazion che Grame Worboys, ispetëur dl’urganisazion nternaziunela per la defendura dla natura (IUCN) à fat do n’ena de vijita, iel nce laudes per la gestion dl’arpejon mundiela Dolomites. Chësta relazion ie unida azeteda tla senteda dl cumité Unesco, ai prims de lugio a St. Pertersburg.
“On da permò giapà la relazion ufiziela dl’Unesco y l nes fej gran plajëi che la ie tan positiva” dij l presidënt dla Provinzia Luis Durnwalder. Ël sorissea dal’autra pert nce che n ie permò te n scumenciamënt: “Nce l ispetëur nes à mustrà su che l ie unì fat la fundamënta, ma śën vala de lauré inant y de ti sté do”. Na nota drët positiva ti à l’cumité dl’Unesco dat ala culaburazion dla cin provinzies. Che la gestion ie unida sëurantëuta da na fundazion, à aldò dl cumité carater de ejëmpl.
La culaburazion cun spartizion di lëures danter la cin provinzies se mostra nce tla strategia generela de gestion. I ciamps de azion ie la cuntreda, la geologia, l turism y svilup sustenibl, la mubilità, la furmazion, la tueda y i raions de defendura. Uni provinzia à n si ciamp, y chësc ie aldò de Durnwalder de gran mpurtanza per lauré ora la strategia che muessa vester anjenieda nchin dl 2016.
La Provinzia de Bulsan à sëurantëut i ciamps dla mubilità y dl turism cun svilup sustenibl. L’Academia Europeica EURAC lëura bele a na strategia turistica per l raion de arpejon mundiela. Tla relazion iel nce unì laudà che n cëla de cunedì la particulariteies dl’arpejon mundiela Dolomites. De chësc viers ne ie nia me unì metù su tofles ulache n ruva ite tl raion, ma nce ponc de nfurmazion per chemuns y cëses di parcs naturei, y mostres.
La relazion positiva ie n var mpurtant, ma danz me n prim var per l’arpejon mundiela Dolomites. L cumité Unesco cialerà do co che l vën laurà inant tres i cuntroi ufiziei dl 2013 y 2015, y pona nce dl 2016 cun na pruzedura ufiziela sun l post.
as
