Inauguraziun dla mostra de Lili Cristofolini tl Istitut Ladin ai 10 d’agost
USP - Lili Cristofolini d’Al Plan é la protagonista dla terza de cater mostres artistiches da d’isté tl Istitut Ladin a San Martin de Tor. N vëndres ai 10 d’agost gnaràl inaudè dales ot da sëra la mostra de sües inzijiuns.
Pro l’inauguraziun tl Istitut Ladin a San Martin de Tor podaràn aldì na introduziun ala mostra de Katharina Moling, che coordinëia inće les mostres da d’isté. Dla cornisc musicala se cruziarà Priska Comploi.
Lili Cristofolini (1989) à studié grafica d’ert al’Université d’Ert Aplicada de Viena. Ara vir y laôra danter Viena y Al Plan. Afascinada dala natöra, dantadöt dales munts, trasformëiera sües linies cun la tecnica dl’inzijiun. Insciö éra buna da cherié na relaziun danter la natöra y l’ert.
La mostra “relaziun” de Lili Cristofolini sarà da odëi ćina ai 20 d’agost ti locai dl Istitut Ladin a San Martin de Tor. Ai 24 d’agost gnaràl spo inaudè la mostra “corusc” de Davide Brandlechner, la cuarta y ultima mostra dl proiet “Mostres 2012” metü a jì dal Istitut Ladin Micurà de Rü y l’assoziaziun di artisć EPL. Ćina śëgn él stè da odëi les mostres de Gerald Moroder de Urtijëi y Gabriele Grones da Reba.
"Mostres 2012" tl Istitut Ladin a San Martin
Gerald Moroder | alter ego
13.7. – 23.7.
Gabriele Grones | ichnos
27.7 – 6.8.
Lili Cristofolini | relaziun
10.8. – 20.8.
Davide Brandlechner | corusc
24.8 – 3.9
as
