60 stieres per nsenianc ladins
USP - Chisc dis possa 60 nsenianc ladins pië do na stiera de suplënza anuela te na scola ladina. Tla Ntendënza Ladina a Bulsan iel (INIER) ai 7 de agost unì sëurandat la suplënzes anueles per nsenië tla scoles elementeres, mesanes y autes. Chësta stieres per dut l ann de scola à pudù pië do chiche à l’abilitazion y che ie tla graduatories aldò. Ntan i proscimi dis uniral tla direzions de scola mo sëurandat stieres aldò dla graduatories de istitut per nsenianc zënza abilitazion.
Tla scoles elementeres dla valedes vëniel, sëuraprò a chëi che à na stiera de rodul, sëurandat 40 stieres per l proscimo ann de scola. 27 stieres ie unides slungëdes dal ann passà y 13 vën sëurandates a nsenianc nueves. Una maestra à tla Ntendënza Ladina giapà la stiera aldò dla graduatories provinzieles. L’autra stieres vën sëurandates diretamënter dala direzions de scola a nsenianc che ne à mo nia pudù fé l’abilitazion de nseniamënt.
Tla scoles mesanes y autes vëniel per l proscimo ann de scola sëurandat 20 stieres sëuraprò a chëles de rodul. 8 stieres ie per l nseniamënt dla scoles mesanes y 12 tla scoles autes. N sëul nseniant à tla Ntendënza Ladina giapà na stiera anuela aldò dla graduatoria provinziela. L’autra stieres anueles vën nce per la scoles mesanes y autes sëurandates diretamënter dala direzion de scola a nsenianc zënza abilitazion.
Leprò a chësta suplënzes anueles vëniel nce dat ora stieres per vel ëura de nseniamënt y per l servisc de ntegrazion y sustëni.
La situazion particulera che l de de plu nsenianc zënza abilitazion depënd dala dispunibltà dl Minister talian de scrì ora cuncorsc aldò. Ti ultimi ani ne ie chësc nia plu unì fat. Na segonda puscibltà de giapé l’abilitazion de nseniamënt fossa l practicum frumatif, ma nchinamò ne ie nce chësc mo nia unì nvià via da pert de Roma.
as
