Scora / Cultura | 04.09.2012 | 14:51

Di dla Scola Ladina: l ne unirà nia sparanià pra i nsenianc

USP – Pra l Di dla Scola Ladina à l presidënt Durnwalder y l assessëur Mussner garantì che tla scoles ladines ne uniral te chisc tëmps de sparani nia smendrì la stieres di nsenianc, sce se mantën la cumpëida de sculeies. Cun l danmesdì de ajurnamënt per nsenianc y respunsabli dla scoles ladines, iel (NCUEI) ai 04 de setëmber a Al Plan de Mareo unì nvià via l ann de scola (che scumëncia duman cun la lezions).

"Duc messons tenì pea a sparanië, ajache cun la Talia sons duc tla medema berca. Ma la va de mëter prioriteies ulà sparanië" à dit l presidënt Luis Durnwalder pra l Di dla Scola Ladina. Tl ciamp dla scola uniral cialà de sparanië tl'aministrazion, ajache l ne muessa nia vester che chësta vënie fata trëi iedesc, per la pert tudëscia, la pert taliana y la pert ladina. L presidënt dla Provinzia à segurà al mond dla scola ladina che deguni dëssa avëi tëma che l vënie sparanià pra la stieres di nsenianc. "Per la pert che reverda i cuntenuc de scola uniral mantenì la trëi ntendënzes" à segurà l assessëur Mussner. Te na vijion de sparani à l ntendënt Roland Verra metù a cuer la particularità dla mendranza ladina sorissan che l ie debujën de cërta strutures nce sce la mendranza ne possa nia tenì pea cun la cumpëides.

La situazion economica atuela pëisa nce sun l marcià dl lëur per i jëuni. L assessëur ala scola ladina à nvià i nsenianc a na valutazion sciorfa ti prim ani de scola, ma pona de judé ai jëuni tl ejam de matura a na maniera che i se feje plu saurì a abiné n lëur o a giapé na lerch tl'università. Tl cuntest dla pruspetives de lëur per i jëuni à nce l presidënt dla Provinzia fat n apel ala respunsabltà dla scola de judé i sculeies cun na bona cunsulënza acioche i se abina la drëta streda tl mond dl lëur.

L nseniamënt dla rujenedes, cun nce nglëisc dala cuarta elementera inant, à giapà de gran laudes. Cun plajëi à nce l assessëur ladin rujenà che la stima per l sistem scolastich paritetich di luesc ladins ie ti ultimi ani for inò cresciù y nsci dëssen nce jì inant. Purempò à Durnwalder metù a cuer de nia ti dé manco mpurtanza ala rujeneda ladina y de mantenì la cura dl plurilinguism dala scolina nchin ala scoles autes y pona inant tl'università.

L Di dla Scola Ladina à nce pità mpulsc de carater pedagogich. L prufessëur dl'università de Son Gagl/St. Gallen Rico Cathomas a tenì n referat sun la tlasses che n ne à nia tla man. A livel de urganisazion à Felix Ploner prejentà n sistem nuef per aministré i cursc furmazion per nsenianc tres internet.

De plu fotos dl Di dla scola Ladina sun la plata facebook „Jonta dla Provinzia de Bulsan“