Stat-Provinzia: paredlà cumpetënzes y custimënc
USP – La Provinzia tën tla tratatives cun l Stat sun si pruposta de tò ju custimënc al bilanz statel te chëla de sëurantò cumpetënzes. La zifres ie (NSËIRA) unides paredledes a Roma dai tecnics dla Provinzia y dl Stat.
„Tl paredlé dla zifres da tramedoi pertes iesen ruvei a una de lauré inant sun l sciazé di custimënc" spiega l Presidënt dla Provinzia do la tratatives di tecnics dla Provinzia, dla Presidënza di ministri y dl Minister ala finanzes.
La basa dl'ancunteda a Roma ie mo for stata la pruposta che Durnwalder ova bele de fauré sëurandat al presidënt di Ministri Mario Monti. La Jonta provinziela ova fat la pruposta de sëurantò i custimënc de servijes statei tl Südtirol y de pudëi perchël sëurantò cumpetënzes. "De na tel pruposta ne possel nia unì tëut na dezijion a livel de tecnics, ma l muessa n iede unì njenià la basa acioche la zifres stimeneda da tramedoi pertes" spiega l presidënt dla Provinzia.
A Roma iel śën nce unì fat ora che la Provinzia anjenië na lista di servijes statei che la fossa desposta a sëurantò per ti tò ju pëis ala finanzes stateles. L ie nce unì damandà de sciazé plu avisa i custimënc che l Stat se sparaniessa tres chësta soluzion. Per la calculazion dëssel unì tëut ca la zifres che vën dates ora n iede al ann dai tecnics dl Stat.
L proscimo var sarà mo n barat a livel tecnich. La Presidënza di Ministri se à tëut dant de ti dé la zifres ai Ministeries de cumpetënza per na valutazion. "La zifres cuntroledes dai ministeries dëssa pona vester la basa per nvië via la tratatives a livel politich per crì do na soluzion che jude a ressané la finanzes dl Stat y che, dal'autra pert, nes lasce nce autonomia", nsci l presidënt dla Provinzia.
as
