Unernanzes dl Tirol a 13 persunaliteies dl Südtirol
USP – Tl Ciastel Tirol iel (NCUEI) ai 16 de setëmber unì sëurandat uneranzes dl Lond Tirol a 42 persunaliteies. 13 crëujes de merit à giapà tei dl Südtirol, danter chisc nce trëi di luesc ladins. L mpëni che la persunaliteies à abù per la cumenanza ne ie nia velch da uni un, perchël ti vëniel iust te chisc tëmps dat mpurtanza cun la uneranzes.
La crëusc de merit ie do la varëta y la bedaia, la terza uneranza plu auta dl Lond Tirol. Ann per ann vëniel unerà persunaliteies dl Tirol y dl Südtirol cun la crëusc de merit, baratan ju danter Dispruch y Ciastel Tirol. Chëst ann iel unì sëurandat la uneranzes tl Ciastel Tirol, valorisan l merit de 42 ëiles y ëi dla doi provinzies. La crëujes ie unides sëurandates dai doi presidënc Luis Durnwalder y Günther Platter deberieda cun de plu assessëures provinziei.
L presidënt dl Südtirol à te si rujeneda sorissà che la bona economia che ti dà da lëur a truepa jënt, la furmazion y la cura dla pert soziela ne se fej nia dassëula. „Śën nes vala bona, ma ti ani passei iel unì metù a jì doi provinzies modernes. Cun l mpëni dla persunaliteies uneredes iel stat mesun fé su chël che on aldidancuei" à dit Durnwalder sorissan che me normes ie massa puech, l va de bujën de persones che les mët n drova. Te si rujeneda à l presidënt dla Provinzia nce nunzià l'ultima dezijion te Cunsëi provinziel: „cun la lege sun la toponomastica ons stlut ju l ultimo pont daviert dl Paket. Chësc ie n gran suzes. Cun l cumpromis ne sarà nia duc cuntënc, ma ne dasson nia for cialé chël che ne ie nia unì arjont, ma chël che ie unì arjont" à dit Durnwalder.
La crëujes de merit ie esprescion dl mpëni per mantenì l vedl Tirol y che uni un possa viver si identità. L presidënt Platter à metù a cuer che truep ne se ëssa nia svilupà y ne jissa nia tan bën, sce ne assan nia abù persunaliteies che se ëssa dat da fé sciche i unerei.
Danter 13 unerei dl Südtirol, iel nce trëi di luesc ladins:
- Paola Bioc Gasser (San Martin de Tor/) per si merit ala grupa de rujeneda ladina y funzionera dl'Svp
- Bruno Senoner (Santa Crestina) per si merit da ambolt de Santa Crestina
- Marcello Varallo (La Ila) per si merit tl sport dai schi sciche presidënt dl Cumité de Copa dl Mond Alta Badia
- Ignaz Ladurner (Dorf Tirol) per si merit da ambolt de Dorf Tirol y tla Comunità raionela
- Manfred Schmid (Terenten) per si merit da ambolt de Terenten y tla Comunità raionela
- Margret Bergmann (Bulsan) per si merit da pedagoga dl liejer y ativista de pesc
- Herbert Santer (Toblach) per si meric per l'enes Gustav Mahler y l sport dl podejé y turism te Puster
- Josef Passler (Innichen) per si merit da ambolt de San Ciana/Innichen
- Klaus Platter (Bulsan) per si merit tl zënter de agricultura Laimburg
- Franz Lintner (Eppan) per si merit da ambolt de Eppan
- Giancarlo Bertagnolli (Bulsan) per si merit tla terapia y fundatëur dl'assoziazion "La Strada - Der Weg"
- Serafin Troi (Persenon) per si merit te aministrazions dla Diozeja y tl'agricultura dla Val d'Isarch
- Klara Rieder (Persenon) per si merit pedagogich y soziel sciche muniga
as
Galaria dales fotografies
