Jonta provinziela: nchin a 12% de sparani tl bilanz 2013
USP – Per l proscimo ann fej la Jonta provinziela cont da avëi 80 milion de euro de manco a desposizion permez ala soma che possa efetivamënter unì spenduda chëst ann. Nce sce la situazion finanziera ne ie nia bona, ne messerà la Provinzia nia fé debic. Chësc ie unit ora dala senteda da (NCUEI) ai prim de utober, canche i assessëures provinziei à tratà la reduzions che ie de bujën per stlù ju l bilanz de previjion 2013.
Per chësc ann fovel udù danora 5.124 milion de euro per l'Aministrazion dla Provinzia de Bulsan. "Per via dla mpustazions de sparani pudons chëst ann me spënder 4.422 milion y per n auter ann saral mo n iede 80 milion de manco " à cunedì l presidënt Luis Durnwalder riesc do la senteda. La majera pert dl bilanz provinziel reverda custimënc che ne se lascia nia scurté, la pert flessibla fej ora feter 1,5 miliardes y nsci muessa la reduzion de 80 milion unì spartida sun chësta segonda pert. De cunseguënza à la reduzion per n auter ann n gran pëis sun chisc capituli. La Jonta provinziela ne uel nia sparanië dlonch unfat y à rujenà de prioriteies.
I ciamps ulà che l unirà me scurtà de puech ie dantaprima la families y l soziel cun feter 1,8% de manco permez a chëst ann. Nce tla furmazion possen per n auter ann fé cont cun feter la medema somes (-0,7% permez al 2012).
Cuncretamënter messeral sun i capituli flessibli unì sparanià nchin a 12% permez ala previjion dal ann passà. L presidënt dla Provinzia à rujenà de reduzions danter 5 y 7% te capituli dla cultura y pona de reduzions de 12% pra la stredes. Chësc ie de plu permez a dan valgun mënsc canche n fajova cont cun me 5% de manco.
La Jonta provinziela fej cont de ruvé l'ena che vën a na dezijion definitiva sun la pruposta de bilanz 2013 y leprò la lege finanziera. Ntant messerà uni assessëur cialé co che l pënsa de spartì su la reduzions per l ann che vën sun si capituli de cumpetënza. Nchin ala proscima senteda dla Jonta provinziela iel nce udù dant de traté cun l Cunsëi di Chemuns per la pert che reverda l'aministrazions chemuneles.
as
