Prim nseniamënt per nglëisc tla scoles autes ladines
USP - Per la pruspetives de lëur y de studi giata l savëi de rujenedes for na majera mpurtanza. Tla scoles autes di luesc ladins vëniel chëst ann per l prim iede tratà tematiches tla rujeneda nglëija per anjenië mo miec i jëuni sun si streda prufesciunela do la scola auta.
A livel naziunel ie bele udù dant che tla tlasses autes possa vel materies ntieres nce unì nseniëdes tla rujeneda nglëija. Tla situazion particulera dl Südtirol cun la segonda rujeneda ne lascia i regulamënc chësc mo nia pro. Tla scoles autes ladines se an bele metù sun la streda dl nseniamënt de cuntenuc nce tla rujeneda nglëija. Chëst ann vëniel per l prim iede nsenià vel argumënc tla rujeneda nglëija cun l fin de ti pité ai jëuni de miëura pruspetives per l daunì.
Tla cuarta y cuinta tlasses de duta la scoles autes di luesc di ladins vëniel chëst ann tratà vel argumënt per nglëisc aldò dla metodologia CLIL (Content and Language Integrated Learning). Tl lizeum d'ert Cademia vëniel dantaprima nsenià argumënc de chimica urganica per nglëisc. Ti isitutc tecnics a Urtijëi y a La Ila uniral fat uniteies che reverda la geografica economica, la corispundënza, storia, sozietà y economia. Vel proiet de chësc vies vëniel nce fat tla scola mesana de Sëlva.
L proiet de nsenië singuli argumënc per nglëisc à l fin de ti pité ai jëuni na miëura basa per l'amiscions a universiteies y per l mont dl lëur. "I sculeies mpera a chësta maniera dut n'autra dimenscion dl adurvé la rujeneda y devënta nscì scialdi plu operatives" spiega l ntendënt Roland Verra.
Per chësc var inuvatif dla scoles autes ladines iel bele ntan l ultimo ann de scola unì fat na furmazion di nsenianc. Deberieda cun l'esperta Sandra Lucietto se à i nsenianc njenià ca per l nseniamënt de cuntenuc tla rujeneda nglëija. Chëst ann vën la prima speriënzes pratiches usservedes y analisedes dala prufessëura. Te chësc prim ann vën l nseniamënt di argumënc per nglëisc fat da doi nsenianc: un dla materia y un dla rujeneda.
as
L ntendënt Verra sun l proiet de nseniamënt de cuntenuc per nglëisc
- Scarica il file audio 311 kb
