Politica | 15.10.2012 | 15:31

Scurtà 120 milions per mpustazions nueves da Roma

USP – Sparanië 70 milion de euro y ne n tò ite 50 de manco: nuviteies da Roma fej feter for referimënt al bilanz provinziel y a chësta maniera à la Jonta provinziela (NCUEI) ai 15 de utober per na segura metù 120 milion de euro sun na pert per vester anjeniei ala pertendudes nueves da Roma.

L Guviern talian à l'ena passeda lascià audì nuviteies che à nce cunseguënzes sun l bilanz provinziel. Per la Provinzia uel chësc di che l bilanz messerà à da una pert scurtà de 70 milion de euro y dal'autra pert uniral ite de manco per via dl lascé do chëutes y manco ntredes. „Smëndrì la chëutes de un n pont de percënt cumporta che l ruva 50 milion de manco tla casses provinzieles" à dit l presidënt dla Provinzia riesc do la senteda dla Jonta.

I assessëures provinziei à cialà co se anjenië ai taies nueves da Roma. La se tratova de abiné 120 milion tl bilanz da mëter sun na pert. La Jonta provinziela à abinà doi ciamps. Un ie l capitul per frabiché cuatieres ulache n scurterà 20 milion. „Chësc tai ie bën da tenì ora ajache tlo ne iel nia unì adurvà duc i scioldi a desposizion" à spiegà Durnwalder.

L auter capitul che unirà scurtà ie l fond de inuvazion dla provinzia ulache l ie mo 140 milion zënza destinazion. „De chësc fond tulerons, per ntant, 100 milion a na maniera da vester anjeniëi per l scurté da Roma" à dit l presidënt dla Provinzia fajan referimënt ala spezificazion „per ntant". Da permò iel unì fat recurs ala normes finanzieles dl Stat, ajache les ne respetea nia l'Acurdanza de Milan. Sce la suneria ti dà rejon ala Provinzia nce me te un n prozes, uniral tëut demez taies. „Pona possa i scioldi a desposizion inò unì tëuc ca a per l fond de inuvazion" à dit l presidënt dla Provinzia.

Do la mudazion gaujeda da Roma, à la Jonta provinziela mandà inant si pruposta de bilanz 2013 al Cunsëi provinziel. La lege finanziera vën dant mo mandeda al Cunsëi di chemuns dl Südtirol.

as