Armunisazion europea dl mestier da maester de schi
USP – La comunità europea uel mëter a jì na cualificazion unitera per i maestri de schi. N reprejentanza dla Jonta provinziela, se pera l assessëur Hans Berger contra na tel regula ajache la ne vëija nia dant standard sciche tl Südtirol. (NCUEI) ai 14 de nuvëmber à Berger, deberieda cun l presidënt di maestri de schi dl Südtirol Claudio Zorzi, tëut pert a n’ancunteda a Brüssel ulache i se à damandà i standard y à giapà sustëni da d’autri raions.
La Cumiscion europea ie tl lëur de purté inant l recunescimënt dla cualificazion di maestri de schi sëura la sëides de stat. L'idea dla UE ie de mëter a jì n zertificat europeich da maester de schi che possa permò unì fat do avëi i ejams "Eurotest" y "Eurosecurity". Aldò dl assessëur Berger ie chësc massa puech, ël se damanda che i maestri de schi sebe nce nëut n cont de cultura y natura o nce de savëi pedagogich. "Chiche fej na furmazion da maester de schi tl Südtirol, mpera ntan 90 dis savëi y cumpetënzes. Cun na tel furmazion iel nce mesun pité na vela turistica de cualità. L'armunisazion che vën purveda ora chësc inviern ne garantësc nia chësta cualità y la fossa de dann per i maestri da tlo ajache maestri de autri stac europeics pudëssa lauré cun manco cualificazion".
Ntan la proscima enes scumëncia te 8 stac europeics na prova che jirà nchin de juni 2013. Nce la Talia fej pert de chësta prova, ma zënza la provinzies de Bulsan y Trënt ajache la regules de chësta provinzies fova unides azetedes dala UE. Per i maestri de schi ne se muda per la sajon 2013/13 mo nia. "Degun recunescimënt zënza standard" dij Berger.
Cun chësta maniera de udëi se à l Südtirol, deberieda cun d'autri, fat inant contra la liberalisazion. A Brüssel iel per l prim iede unì paredlà i sistems de furmazion mustran su de majera defrënzes. De chësta idea iesen nce tl'Austria y tl Deutschland.
as
