Politica | 19.11.2012 | 14:56

Jonta provinziela se pera dal Guviern sun la lege dla toponomastica

USP – La soluzion data pro te Cunsëi provinziel per ressolver la descuscion sun la toponomastica tla provinzia de Bulsan ne vën nia azeteda dal Guviern talian che à fat recurs pra la Chëurt costituzionela. Te si senteda da (NCUEI) ai 19 de nuvëmber à la Jonta provinziela fat ora de se paré y sce l ie de bujën nce de se damandé sustëni a livel nternaziunel.

Tl cumpromis dat pro te Cunsëi provinziel iel udù dant che inuemes de pitli raions, de vel mont o de vel lech che ie nravisei tla cumenanza, possa nce me unì adurvei tla verscion tudëscia o ladina. "l patron de n luech da paur à l dërt privat de ti dé n inuem a si puscion, chësc muessa nce respeté l Stat" à dit l presidënt Luis Durnwalder tla cunferënza stampa do la senteda dla Jonta.

L Guviern talian ne azeta nia la lege provinziela dijan che me i inuemes talian fossa legitims y azetei democraticamënter. I inuemes tudësc dëssa pudëi unì juntei pro sce l vën documentà che i ie nravisei tla populazion. "Chësta nterpretazion dl Guviern ie na falsificazion dla storia" à dit Durnwalder, che à sorissà che l'urità ie avisa l cuntrer. "Chiche cunësc l 1923 sà avisa che i inuemes taliani ne ie nia nasciui democraticamënter y ne ie nce no legitims. L ie inuemes nventei", nsci l presidënt dla Provinzia.

Tla senteda dla Jonta provinziela ie unì fat ora de se paré dal recurs dl Guviern y sce l devënta de bujën, de damandé n sustëni a duc i livei, nce pra istituzions nternaziuneles. Durnwalder à nvià i chemuns de mëter n droa la lege provinziela sun la toponomastica (acurdanza Durnwalder - minister da dant Fitto), metan a cuer che i inuemes di luesc ie pert dla cultura y dla storia de nosc raions, y l ne ie nia da azeté che la nvenzions vën trates dant.

La cuestion dla toponomastica ie l sëul pont dl pachetl che ne ie mo nia unì finà via, perchël se mpëia la Jonta provinziela particularmënter a pudëi stlù ju la cuestion. "On abù crëta che l Guviern azetësses chësc cumpromis, ma mo n iede ons giatà na delujion ajache i ministri ne uel nia tò n cunsciderazion l'autonomies y ne demostra deguna sensibltà per mendranzes" à dit Durnwalder.

as