L Cor di mutons de Sëlva pra l “Avënt ladin”
USP – L cianté dla mutans y di mutons se adateda particularmënter tl tëmp d’Avënt. Pra l cunzert d’Avënt de grupes ladines tl Dom de Bulsan, cianterà ai 14 de dezëmber nce l Cor di mutons de Sëlva. Deberieda cun mo cin’ d’autra grupes uniral dat demustrazion dla tradizion ladina de cianté l Avënt al publich de Bulsan.
Nce sce l Cor di mutons de Sëlva ie cun si cianté bele ruvà a Philadelphia, Washington y New York, y à nce venciù cuncorsc, ie l fin de de chësc cor per drët n auter. Cun si atività se à Paul Senoner, che mëina l cor, tëut dant de ti pité ai sculeies ucajion de ruvé permez ala mujiga y al cianté. "Cianté uel di educazion y l'esperienza de cianté sun l palch ie de gran valor per l svilup di sculeies", sorissea l dirighënt Senoner.
Majera pert dla cianties che vën mparedes ie tla rujeneda ladina y a chësta maniera à l Cor nce na funzion de viers dla rujeneda. Pra si reprejentazions te scola, te dlieja y te mo d'autra ucajions cianta i Cor di mutons de Sëlva nce per tudësch, talian y for inò nce per nglëisc. La ujes dla mutans y di mutons vën cumpanies cun l orgun, l'armonica o l'erpa.
I 25 mutons y mutans, danter 8 y 14 ani, à bele abù suzes pra cuncorsc. I majeri ie stai canche l cor à venciù l cuncors naziunel per cores de sculeies a Malcesine dl 2001 y l cuncors "Jugend singt 1984", per chël che l cor fova unì metù su.
L cunzert d'Avënt tl Dom de Bulsan ie dut auter che na prima speriënza per i sculeies de Sëlva. De tei cunzerc ai bele ciantà tl'Engiadina, tla Uniersità de Dispruch y a Udin.
L cunzert d'Avënt ai 14 de dezëmber a Bulsan, metù a jì dal Assessorat provinziel ladin, ie prugramà per la sies da sëira.
Avënt ladin a Bulsan: l cunzert y la grupes
as
