Ambiënt | 15.12.2012 | 19:32

Durnwalder y Mussner a Badia per se fé n cheder dla situazion (cun audio)

USP – L raion tucà dala gran smueia a Badia ne se muev nia plu tan debota. Te chësc mumënt vëniel cialà de schivé che la ruve nchin tla Gran Ega. (NCUEI) N sada, 15 dezëmber, se à l presidënt dla Provinzia Luis Durnwalder y l assessëur ladin Florian Mussner fat n cheder dla situazion. „Ala families tuchedes da chësta catastrofa ti stajerons daujin tant che puderon“ à detlarà Durnwalder.

Feter 40 hectar daujin ala viles Sottrù y Anvì se muev. La bona nutizia ie che l raion ne se muev nia plu dat debota sciche inier. Sce n vënderdi iel mo unì muserà n muvimënt nchin a 80 metri al’ëura, se muev l raion śën mo da 10 a 15 metri al’ëura. Sëuraprò ala streda che ie bele unida ruineda n vënderdi, ne iel nia plu stat dann a nfrastrutures. Ma 11 families, cun de ndut 36 persones, ne possa mo for nia jì de reviers te si cëses.

N sada ie l presidënt dla Provinzia, respunsabl per la prutezion zevila, stat sun l post deberieda cun l assessëur Florian Mussner, l diretëur de repartizion Heinrich Holzer y Hanspeter Staffler che mëina l zënter de prutezion zevila provinziel. Ëi ti à cialà al lëur che à fat la repartizion per costruzions idriches, i geologhes y i destudafuech.

„Te chësc mumënt ne se lascel nia di coche se svilupea la situazion, l raion vën monitorà da uni ëura“ à dit Durnwalder sorissan che l puderà permò unì fat pruvedimënc canche l piec sarà passà. Ntant resta i esperc sun l post. N lunesc cialerà la Jonta provinziela co ti judé ala families tuchedes da chësta smueia.

L majer pericul ie te chësc mumënt che la smueia ruve jù nchin pra l ruf. I esperc dla repartizion per costruzions idriches à bele usservà sfëntes tla costruzions de ruf. Per garantì che l’ega ne vënie nia tenida su nce sce la smueia ëssa de ruvé te ruf, iesen tl lëur de fé lerch te n toch de bosch per pudëi mëter roles da avisé ntëur la Gran Ega. Pruvedimënc iel nce unì fat per schivé dann ala viles de Sottrù y Martara.

Ntant iel nce unì spartì i lëures. De mëter ju roles se cruzia i esperc dl ufize ruves da mont y i destudafuech. La repartizion provinziela per i bòsc cëla co fé na streda per ruvé permez ala cëses danter Oies, Frenademez y mo’autra cëses che n ne ti ruva nia permez. L Chemun se cruzia dla families che à messù mucé ora de cësa. „Tlo vëijen inò n iede tan mpurtant che ie na bona preparazion dla grupes de ntervënt, ma la fundamënta ie la despunibltà da duta la pertes de judé“ sorissea l presidënt dla Provinzia.