Desvalì | 19.12.2012 | 17:47

Ancunteda da Nadel per i media (cun audio)

USP - A n ann de gran muvimënt iel (N SËIRA) ai 18 de dezëmber unì cialà de reviers, ma nce cialà inant pra la tradiziunela ancunteda da Nadel dl presidënt dla Provinzia y i media. Chëst, ultimo iede per Durnwalder, iela unida tenida tla scola auta per l’alimentazion a Haslach.

Ann per ann à l presidënt dla Provinzia, chëst ann cumpanià dai assessëures Hans Berger y Florian Mussner, nvià i jurnalisć dl Südtirol, dl Tirol y dl Trentino a n’ancunteda da Nadel. Tlo ne iel nia me unì cialà de reviers al ultimo ann, ma nce a na scola auta y a chël che la pieta. Chëst iede iel l’ancunteda unida tenida tla scola auta per economia de cësa y alimentazion a Haslach che à pità lerch a feter 200 reprejentanc di media.

L presidënt dla Provinzia à rujenà de n ann de gran muvimënt. For inò an messù se paré da agrescions al’Autonomia da pert dl Guviern Monti. „Chësc guviern ne à mo nia capì che la regions y l federalism ne ie nia la gauja dla casses stateles uetes, ma i strumënc de soluzion“ à dit Durnwalder che à nce rujenà dla manipulazion di cuncorsc per la cunzescion da fé strom. „Chësc cajo ne ie nia da azeté y l ne ie nia da se fé marueia che la jënt à perdù la crëta tla politica“ à dit l presidënt dla Provinzia, purempò: „chisc fai ne ie nia rejon per pesimé de duta la politica dl strom o de fé ora stleta nosta Provinzia“. Durnwalder à lecurdà la festa dl’Autonomia a Maran cun i presidënc de Stat Giorgio Napolitano y Heinz Fischer, la cumpededa dla jënt, l’adunata di Alpini (“i zitadins ie stai plu da fundamënt che vel persona dla politica”) y l festival dl’inuvazion. L presidënt à nce rujenà dla catastrofes naturela a Pfitsch y Badia. “Nce sce les fova tragiches, les dà nce crëta ajache on udù cun ce solidarietà che l ie unì judà y tan bën che funzioneia la prutezion zevila stizeda sun l ulentariat” nsci Durnwalder.

Nce per l 2013 se aspieta l presidënt n ann de gran muvimënt, caraterisà dala veles parlamenteres y provinzieles.