Passa 8 milion per l internet aslune, prugramà de plu lëures ti luesc ladins
USP – La Jonta provinziela à (NCUEI) ai 04 de merz dat pro l program dla nfrastrutures per la rë de culegamënc internet a slune. Sun pruposta dl assessëur Florian Mussner uniral ntan l 2013 fat lëures per n custimënt de 8.170.000 euro. Per i lëures tla Val Badia y te Gherdëina iel chëst ann udù dant na nvestizion de belau na milion de euro.
La Provinzia à udù dant de purté i culegamënt de internet aslune tres fibra otica mo ntan chësc ann nchin te uni chemun. La spartizion dla zentreles ala singula cëses ie pona tla mans dl chemun de cumpetënza. "Davia che i chemuns se stënta a fé l ultimo toch nchin pra la cëses saral de bujën de programs speziei te chëi che la Provinzia te mprësta scioldi a bon priesc" à dit l presidënt Durnwalder tla cunferënza stampa do la senteda dla Jonta.
L program dla nfrastrutures per l internet aslune vëija nce dant de plu lëures acioche la firmes y la families ti luesc ladines posse se nuzé miec dla rë. Danter i lëures bele nviei via iel la roles danter Longega y Al Plan, y la roles da Longega nchin a La Ila. Per chisc doi pec iel udù dant n custimënt de 194.000 euro. La proietazion dl culegamënt danter Piculin y San Martin de Tor ie tl lëur de unì stluta ju. Sun l program 2013 iel per chësc toch udù dant n custimënt de 120.000 euro.
Per mëter ju la roles te Gherdëina, da Ciastel a Urtijëi y da Urtijëi nchin te Sëlva iesen tl lëur de stlù ju la proietazion. Per chisc doi proiec iel per l 2013 udù dant na nvestizion de 400.000 euro. Per vel culegamënc de internet aslune iel unì fat cunvenzions cun la cumuniteies de raion. N ejëmpl pieta tlo la streda dala rodes a Runcadic ulache l ie nce unì metù la roles per pudëi pona tré tres i cabli de fibra otica.
Danter i proiec che ie unic tëuc su da nuef tl program di lëures per la valedes ladines iel l pez da Pidrô a La Val y l tré tres dla fibra otica da Urtijëi nchin te Sëlva.
as
