Stieres tres spezialisazion prufesciunela, ressanamënc de cuatieres y barat cun casermes
USP - Tl mpëni acioche la jënt ebe de plu da lëur, à la Jonta provinziela (NCUEI) ai 04 de merz dat pro cursc de spezialisazion prufesciunela. Tla proscima sentedes dëssel unì dat pro pruvedimënc per l ressanamënt de cuatieres y per purté inant plu riesc l barat de cuatieres fai su dala Provinzia cun puscions de vedla casermes.
![](/news/img/lazy.gif)
Chisc trëi majeri pruvedimënc cumporta aldò dl presidënt dla Provinzia Durnwalder de plu pusciblteies de lëur per chëi zitadins che ie te chësc mumënt zënza lëur. Cunscidran i jëuni da 15 ani suvier, iel te chësc mumënt 4,6 percënt de chëi che pudëssa lauré che ne à nia na stiera. "L se trata tlo de feter 11.000 persones zënza lëur y perchël ie de bujën de programs" à dit Durnwalder riesc do la senteda dla Jonta. Dal'autra pert à 81 percënt de duc i ëi na stiera, danter l'ëiles nen iel 68 percënt - che ie aldò de Durnwalder drët n bon valor.
Un de chisc programs ie i cursc de spezialisazion per lerneri. Aldò dla lege sun i lerneri vëniel metù a jì na spezialisazion che vëija dant 40 ëura de furmazion che tol ite de plu materies. Chësta furmazion nueva ie ududa dant per lerneri da 18 nchin a 29 ani che à fat na scola auta, n studi universiter, ma nce per chëi che ne à nia fat scoles spezieles. L fin primer de chësta forma de cuntrat de lëur per lerneri ie chël de ntegré jënt tl marcià dl lëur y de ti dé na furmazion per na stiera cuncreta. L cuntrat nstës unirà regulamentà tres i cuntrac coletives.
Tl cajo de n cuntrat da lerner de spezialisazion porta l patron de lëur la respunsabltà per la furmazion spezifica. La Provinzia de Bulsan à udù dant che l vëni nce dat pëis a na pert che reverda culegamënc danter plu materies. Aldò dla delibra dla Jonta provinziela iel ntan l prim ann udù dant n curs de doi dis dedicà al dërt de lëur, la segurëza tl lëur y la comunicazion tl lëur. Da pert dl Ufize provinziel per i lerneri y furmazion da moster, uniral ntan i proscimi dis mandà ora la nfurmazion plu avisa ai patrons de lëur y ai lerneri. L presidënt dla Provinzia à cunedì che i prim cursc scumencerà bele de auril.
N pruvedimënt che reverda l frabiché unirà tratà tla proscima sentedes dla Jonta provinziela. Aldò dl presidënt dla Provinzia uelen dé pro n pachetl de pruvedimënc che reverda l ressanamënt de vedli cuatieres ti zëntri di luesc. L Presidënt à rujenà dla puscibltà che la Provinzia paia bele danora chëla soma che possa unì trata ju dala chëutes, de n bonus de cubatura y de cuntribuc provinziei sëuraprò aldò de tant che la Provinzia spendëssa a sustenì l frabiché alesirà ora di zëntri di luesc (mez l custimënt dl grunt y feter mez dla nfrastrutures primeres).
N terzo pruvedimënt economich che dëssa purté pro a dé da lëur ie la barat de 450 cuatieres cun grunc de vedla casermes. Durnwalder à dit che sun i 8 milion de euro che ie chëst ann bele udui dant per i lëures tla vedla casermes, nen à la Jonta mo metù leprò 8 milion. "Sce i cuatieres vën finei plu abenëura, giatons dant i grunc dal Stat y pudon iló pona inò fé cuatieres nueves che cumporta plu lëur tl ciamp dl frabiché" à dit l presidënt dla Provinzia.
as
Landeshauptmann Durnwalder über die Maßnahmen gegen die Arbeitslosigkeit
- Scarica il file audio 2329 kb
Il Presidente Durnwalder spiega gli interventi a sostegno dell'occupazione
- Scarica il file audio 1902 kb