L vën tëut demez n terzo di liec damandei dal Stat
USP – L Guviern talian ti ova metù dant ala Provinzia de Bulsan de tò demez 216 liec di spediei per sparanië custimënt. La Jonta provinziela à (NCUEI) ai 18 de merz fat ora che ntant dëssel me unì tëut demez na terza pert dla cumpëida damandeda da Roma.
"Nchin che ne on mo degun guviern a Roma, possa la diretiva sun l smëndrì i liec di spediei mo se mudé" à dit l presidënt dla Provinzia Durnwalder tla cunferënza stampa do la senteda dla Jonta. Per chësta rejon ie i assessëures provinziei stai a una che ntant dëssel me unì smëndrì na terza pert di 216 liec che l Guviern Monti ova damandà te tëmp de doi ani. Aldò dla Jonta provinziela vëniel tl spedel de Bulsan tëut demez 20 liec, 14 a Persenon, 12 a Burnech y 18 a Maran.
L assessëur Theiner à fat al savëi che pra la reduzion de liec ne iel unì tenì cont di raions turistics y de criteries de cualità.
as
