Agenzia nueva per cuntroi de cuatieres cunvenzionei possa mëter man
La Jonta provinziela de Bulsan à (NCUEI) ai 13 de mei dat pro l regulamënt de esecuzion dl’agenzia nueva che cialerà do i cuatieres cunvenzionei. Pernan che l unirà metù a jì l’urganisazion dl’agenzia puderà scumencé l’atività de cuntrol.
Passa n chert di cuatieres fai te raions de espanscion nueves muessa unì cunvenzionei: che uel di resservei a jënt cun residënza o stiera tl Südtirol. Dantaldut te raions turistics ne vën chësta cunvenzion suvënz nia tenida ite y cuatieres vën fitei a turisć. Sun dumanda di chemuns à la Jonta provinziela nvià via la istituzion de n'agenzia de cuntrol. "Śën ons dat pro l statut y pernan che n arà coordinà la pert operativa, possa scumencé l'atività de cuntrol di cuatieres" à dit l presidënt dla Provinzia Durnwalder do la senteda dla Jonta.
L problem di cuntroi de cuatieres cunvenzionei ie drët sentì te Gherdëina y tla Val Badia. "Aldò dla statistiches ie luesc sciche Corvara manacei dal pericul che la jënt vede a viver te n auter luech. La rejon prinzipela ie i priejes di cuatieres, perchël ie de mpurtanza che i cuatieres cunvenzionei posse nce unì nuzei dala jënt dl post" à dit Durnwalder. Aldò dl presidënt dla Provinzia se à i chemuns stentà a cuntrolé i cuatieres cunvenzionei y perchël à l'Assoziazion di chemuns damandà che la Provinzia metësse su n'agenzia de cuntrol.
La ncëria da diretëur de chësta agenzia ti ie unida data a Albert Plitzner che ie a cë dla sënta de valutazion dla Provinzia. L cumité de coordinazion unirà metù adum dai assessëures provinziei al'urbanistica y al frabiché alesirà deberieda cun l presidënt dl Assoziazion di chemuns.
Canche i chemuns porta ite tl plann urbanistich raions de espanscion nueves, muessa l 55 percënt unì resservà per l frabiché alesirà (la Provinzia sëurantol mez l custimënt dl grunt y dla nfrastrutures primeres). Dl'autra pert (i 45 percënt) muessa l 60 percënt unì cunvenzionà. (USP)
as
Galaria dales fotografies
Landeshauptmann Durnwalder über die Kontrollmechanismen beim konventionierten Wohnbau
- Scarica il file audio 1117 kb
Il Presidente Durnwalder spiega gli interventi di controllo nell'edilizia abitativa agevolata
- Scarica il file audio 1176 kb
