Streda de Plan de Gralba à zedù: ntervënt de prëscia
La streda danter Plan y Plan de Gralba ie ntan chëst’ansciuda zeduta plu di ani passei. N toch de feter vint metri ne tën nia plu y à n pert messù unì sarà ai auti. Te n sëuraluech à l assessëur ala stredes Florian Mussner sorissà l bujën de n ntervënt de prëscia per garantì la viabltà sun la streda di jëufs.
Tla luegia plu critica, possen te chësc mumënt passé sun mesa larghëza de streda. "Tla sajon auta, ne jirala nia plu cun n semafer, perchël iel de bujën de n ntervënt de prëscia" à dit l assessëur Mussner. Per udëi miec ciun ntervënc che fossa realistics te puech tëmp se à i respunsabli dla Provinzia ancuntà sun l post deberieda cun l ambolt Peter Mussner. Sun l post iel nce unì adalerch l diretëur dl Servisc per la stredes Paolo Montagner, l diretëur per la stredes tl raion Salten Scilier Valter Molon y l diretëur dla repartizion Nfrastrutures Valentino Pagani.
La streda di jëufs à zedù danter la raida da Merch y Plan de Gralba. Chësc toch de streda ie bele plu ani che se muev for inò. "Tlo sons bele tl lëur de fé proietazions per n majer lëur che unirà a custé ntëur cater milion de euro" spiega l assessëur ai lëures publics. La sajon da instà ne ie nia plu da lonc, per garantì la viabltà sun la streda di jëufs lëura l Assessorat provinziel śën per pudëi fé n ntervënt de prëscia. "La se trata de fé n iede l toch de majera bujën, sun la basa dl proiet generel" spiega Mussner. (USP)
as
Galaria dales fotografies
