L Museum de Gherdëina giapa na sënta destacheda
Te na culaburazion danter la Provinzia de Bulsan, l Chemun de Urtijëi y l Museum de Gherdëina an abinà na soluzion per l problem dla lerch tla Cësa di Ladins. Te na prejentazion a Urtijëi iel (NCUEI) ai 06 setëmber unì fat al savëi che tla Cësa de Cultura de Urtijëi uniral anjenià ite na sënta destacheda dl Museum de Gherdëina.
La sënta destacheda dl Museum de Gherdëina unirà dedicheda a na storia culturela particulera dla valeda, chëla che conta 400 ani de tradizion dla chiena. “L ie na storia culturela drët faszinënta che muessa unì mantenida dan che mor ora i testemonesc de chëi tëmps” à detlarà l assessëura Sabina Kasslatter Mur a Urtijëi. La sënta nueva unirà dedicheda dantaprima ala roba da fé damat de lën che la jënt de Gherdëina à vendù te dut l’Europa y ai aspec sozio-culturei che taca leprò.
Do passa 10 ani che i aministradëures publics à purvà a abiné na soluzion dla lerch tla Cësa di Ladins a Urtijëi, à l Assessëur ladin rujenà de n mumënt de gran legrëza a pudëi fé al savëi che la sënta destacheda per l museum ie segureda. “Cun la culaburazion danter Museum, Provinzia y Chemun demustrons che ulon mëter a jì soluzions y ne ulon nia che argumënc de cultura vënie sfrutei per fé politica dainora” à dit Florian Mussner fajan referimënt ala bujën de mëter a post la Cësa di Ladins. L assessëur à stlarì che l uel vester la ulentà de abiné na soluzion y che l ie gran ëura per duta la Cësa, “ajache n duman ne saral nia plu mesun la finanzië”. A inuem dla Jonta provinziela à Mussner detlarà che n sarà for a desposizion per rujené cun duc per abiné na soluzion per la Cësa di Ladins.
Per la sënta destacheda la museum mët L Chemun de Urtijëi a desposizion la sala dla Cësa de Cultura che ie ntan i ultimi mënsc unida nuzeda provisoriamënter dala bibliotech. “L fit per chësta luegia ie debant” à detlarà l ambolt Ewald Moroder. L presidënet dl Museum de Gherdëina, Wolfgang Moroder à fat al savëi che l vën bele laurà te n cunzet prufesciunel, modern y interativ per prejenté la storia culturela lieda ala tradizion dla chiena.
L nteres zentrel dla sënta destacheda sarà la produzion dla chiena che univa defin fata tla valeda. “Ulon mustré su l cuntest de chësta tradizion dala stues ulache l univa ziplà, nchin ora per l mond ulache l univa vendù la chiena” à spiegà la diretëura Paulina Moroder. L cunzet vëija nce dant de traté l argumënt dl’ëiles che ova scumencià l cumerz y l mond di mëndri tl juech. Te na maniera adateda ai tëmps uniral nce trat ite la jënt dl post.
La realisazion dla sënta nueva se stiza sun trëi seves: la luegia dal Chemun, i esponac dal Museum y l finanziamënt dala Provinzia y Region. L assessëur Mussner à rujenà, aldò de n prim cunzet, de n custimënt de 300.000 – 350.000 euro. Na prima pert dala Provinzia unirà bele segureda de utober y ntan vëniel nvià via la pruzedures tla Region. La realisazion ie pona ududa dant per l 2014. Per l’atività giata l Museum 65.000 - 70.000 euro al ann dala Provinzia. L assessëura Kasslatter Mur à segurà de junté pro 28.000 euro per mëter a jì la sënta nueva.
Per la cunferënza stampa iel nce unì adalerch duc trëi ambolc de Gherdëina per sustenì la soluzion per l Museum de Gherdëina.
as
Galaria dales fotografies
