Publicaziun nöia sön la vegetaziun dles Dolomites
USP - „Plant Life of the Dolomites” é le titul dl liber presentè incö, ai 6 de forà dl 2014, tl Museum de Sciënzes Naturales dl Südtirol dai auturs, i dui botanics Erika y Sandro Pignatti. Chësc volum é le früt de passa 50 agn de stüdi y descrî passa cënt assoziaziuns vegetales de döt le raiun dolomitich, n valgönes ćinamai por le pröm iade. La publicaziun numer 8 dl Museum de Sciënzes Naturales dl Südtirol vëgn realisada dal editur Springer.
La publicaziun scientifica nöia "Plant Life of the Dolomites" de Erika y Sandro Pignatti, presentada incö ai 6 de forà dl 2014 tl Museum de Sciënzes Naturales dl Südtirol a Balsan, descrî la contrada y la vegetaziun de döt le raiun dolomitich y pîta informaziuns sön la genesa dla flora alpina vagan da fà n sböz dl svilup tl dagnì. Le pêr Pignatti, botanics dër conesciüs y professurs universitars, à splighé en ocajiun dla presentaziun che: "Ara se trata de na publicaziun olache al röia adöm i resultać de 53 agn de inrescides scientifiches, che ô ester na basa y n incorajamënt por les generaziuns jones da jì inant cun l'ativité de inrescida sön döt ći che é bel, interessant y nü tles Dolomites."
"Chësta publicaziun nöia portarà zënzater pro a fà conësce la contrada naturala y la vegetaziun uniches dles Dolomites a livel internazional, dantadöt tla comunité scientifica," à sotrissé en ocajiun dla presentaziun l'assessur provinzial por i museums Florian Mussner, che à rengrazié i dui auturs y düć i colaboradus por la realisaziun de chësc contribut scientifich de gran valüta.
Le diretur dl museum Vito Zingerle à dit: "Sciöche Museum de Sciënzes Naturales dl Südtirol sunse braui da ester stà bugn, en colaboraziun cun la ćiasa edituria Springer, da publiché y partì fora a livel mondial l'opera de na vita de dui scienzià tan conesciüs sciöche Erika y Sandro Pignatti." Le volum vëgn fora sciöche publicaziun numer 8 dl museum. Zingerle à tut l'ocajiun por rengrazié inće la Fondaziun Cassa de Sparagn de Balsan - rapresentada ala presentaziun da Marjan Cescutti - por so sostëgn finanziar.
Le liber descrî 106 assoziaziuns vegetales (comunitês de plantes definides cun na composiziun de sort tipica), n valgönes por le pröm iade. Dlungia la tlassificaziun scientifica y la descriziun ecologica (altëza, terac, strotöra dla vegetaziun) dles assoziaziuns vegetales che é tles Dolomites, ti à i auturs Erika y Sandro Pignatti dè na gran importanza al'elaboraziun de na cherta geografica de süa destribuziun tles Dolomites, y à metü laprò indicaziuns sön i prighi che manacia les sorts de plantes desvalies, süa sconanza y so manajamënt tl dagnì. Te n ressümé dl monn vegetal à i dui scienzià presentè statistiches sön les formes predominantes y sön la complessité dles corelaziuns danter contrada, ecologia y presënza de plantes. Ai à splighé che "Les informaziuns scientifiches contignides te nosta opera dess ester n contribut important por la sconanza dles Dolomites sciöche patrimone de döta l'umanité".
Nasciü a Aunejia, danter i majeri esperć talians de floristica y ecologia dla vegetaziun, Sandro Pignatti, 83 agn, à insigné ecologia al'Université de Trieste y a "La Sapienza" de Roma, olache al é professur emerit, y autur dl'opera fondamentala "Flora d'Italia". Süa fomena Erika Pignatti (1929), austriaca, à insigné naôta al'Université de Trieste y spo a chëra de Padova. Tramidui à laurè por dejenars a proieć y publicaziuns sön la vegetaziun dles Dolomites.
Le volum "Plant Life of Dolomites. Vegetation Structure and Ecology", publicaziun numer 8 dl Museum de Sciënzes Naturales dl Südtirol, editur y destributur internazional Springer, 769 plates y 500 ilustraziuns, é da ciafè tles botëghes de libri o tla botëga dl museum (codesc ISBN 978-3-642-31042-3) por 155,95 euro. Le liber po gnì cumprè inće on-line sön la plata web dl museum www.museonatura.it/rm.
Info: Museum de Sciënzes Naturales dl Südtirol, str. Bottai 1, Balsan, tel. 0471 412964, web www.museonatura.it/rm.
SAN
