Edema dla mobilité: L’aziun „strades che florësc“ va inant inće chësc ann
USP – Lascè florì les strades y plazes ti zëntri di comuns y dles fraziuns: chësc é le fin dl concurs “les strades che florësc”, che vëgn organisé inće chësc ann tratan l’edema dla mobilité. L’Agenzia por la mobilité inviëia düć i comuns tl Südtirol y tl Tirol da tó pert ala scomenciadia, an po se scrì ite ćina ai 30 de jügn.
Dai 16 ai 22 de setëmber vëgnel organisé tl Südtirol por le setimo iade l’edema dla mobilité europea. “Tratan chësta edema él preodü de plü scomenciadies por diminuì le trafich y aumentè insciö la cualité dla vita”, spliga l’assessur por la mobilité Florian Mussner.
Öna dles scomenciadies é le concurs “les strades che florësc”. Düć i comuns é dër bel invià da tó pert y da decorè les strades por les trasformè te na lerch vitala: por ejëmpl cun festes sön strada, marćia di porësc, pitöres sön strada, evënć sportifs y cun d'atres idees originales. “Les scomenciadies plü originales y beles gnarà spo premiades da na iuria tratan n evënt suraregional de novëmber”, spliga l’assessur Mussner.
Le concurs vëgn organisé dal’Agenzia por la mobilité y dal Ökoinstitut Südtirol, che sostëgn inće i comuns pro la realisaziun pratica dles idees y di conzeć, sciöche inće cun material informatif.
L’ann passè à vigni terzo comun tl Südtirol tut pert ala edema dla mobilité y de plü comuns à inće tut pert ala scomenciadia “les strades che florësc”. Düć i comuns che à interès da fà para po se scrì ite ćina ai 30 de jügn pro l’Agenzia por la mobilité o pro l’Ökoinstitut Südtirol.
rc
