Pröma ediziun dl Labfest Dolomites Unesco a La Val (05-07.09)
La Fondaziun Dolomites Unesco mët da jì por l’isté 2014 la pröma ediziun dl Labfest dles Dolomites Unesco dai 5 ai 7 de setëmber a La Val. Le festival ti dedichëia süa pröma ediziun al tema da munt dl "sié", che gnarà presentè te sü aspeć plü desvalis adoran formes jornalistiches, artistiches y musicales.
Le pröm Dolomites Unesco „LabFest“ vëgn organisé dai 5 ai 7 de setëmber 2014 a La Val. Le tema zentral dla pröma ediziun sarà le sié y süa importanza por la contrada y por l’ambiënt. „I prà da munt y les pastöres fej pert dl cheder dla contrada dl Südtirol y à inće na gran valüta sciöche lercs vitales por l’ambiënt“, sotlignëia l’assessur por l’ambiënt y presidënt dla fondaziun Unesco Richard Theiner. La tematica é liada dandaldöt al’agricoltöra y ala sconanza dla natöra, mo inće ales usanzes y tradiziuns de nüsc raiuns, insciö Theiner.
„Le LabFest Dolomites é na scomenciadia multidisciplinara y pîta insciö l’ocajiun ideala por s’incuntè, por mëte a jì discusciuns y por sensibilisé i abitanć dles valades dles Dolomites sön le raiun dles Dolomites sciöche patrimone Unesco“, spliga l’assessur Theiner.
La temtica dl sié gnarà insciö presentada te sües espresciuns plü desvalies. Al sarà presënt tratan le festival na seria de esperć dl monn dla geografia, dl’architetöra, dl’urbanistica y dla contrada, dl’antropologia, dles sciënzes naturales, dl’economia y dl turism che portarà dant sües idees y propostes sön i aspeć desvalis dl tema chirì fora (p.e.: l’importanza dl sié por la contrada, por l’ecuiliber danter anuzamënt dl teritore y sconanza dla contrada, l’importanza economica). La tematica gnarà presentada te formes leterares y artistiches adoran le jornalism ambiental, la documentaristica, l’aministraziun dl teritore, la musiga y leteratöra, teater, le cujiné, la fotografia.
L’idea dl LabFest é gnüda formulada dal organisaziun ISOIPSE, n grup de profescionisć lëdi dla Provinzia de Belun. "L’idea ti é atira plajüda ala fondaziun „Dolomites UNESCO“ spliga le Presidënt Theiner: „Idees positives y costrutives é begnodüdes y nos sun tres contënć sce les porsones se dà jö cun la tematica dles Dolomites sciöche patrimone dl’umanité.“
Por l’organisaziun se fistidiëia la fondaziun Unesco, l’assoziaziun turistica da La Val, la Lia di Paurs locala, l’Ofize parcs naturai, le sorvisc de consulënza por l’agricoltöra da munt „Bring“, l’Ispetorat forestal da Bornech y de plü uniuns da La Val y dla Val Badia.
Por podëi realisé le festival él gnü metü da jì na campagna de crowdfunding. Por düć chi che ô contribuì ala realisaziun dla scomenciadia y sostëgnì insciö le mantignimënt dla contrada y dl ambiënt dles Dolomites, po s’informè plü avisa chilò: http://www.dolomitesunescolabfest.it/
rc
