La Defensuria popolara nöia Morandell s’incunta cun Arno Kompatscher
Gabriele Morandell, la defensuria popolara nöia, s’à incuntè inier (jöbia, ai 7 de agost) cun le Presidënt dla Junta Arno Kompatscher. Tratan l’incuntada él gnü baié danter l’ater dla nezescité de cherié sinergies danter l’Avocatöra popolara y atres istituziuns analoghes tl Südtirol.
L’aprofondimënt dles problematiches di zitadins y l’ascuté sö les porsones: chisc é dui di punć plü importanć por Gabriele Morandell te so laûr nü sciöche defensuria popolara tl Südtirol. Morandell à metü man süa inćiaria presciapüch dan da trëi edemes. Tratan l’incuntada cun le Presidënt dla Junta Arno Kompatscher à Morandell confermè de laurè cun personal motivé y competënt. "Da trames les perts él gnü confermè che vigni chestiun portada dant dai zitadins mëss gnì tuta en conscideraziun te na manira seria", à splighé le Presidënt Arno Kompatscher.
Öna dles chestiuns plü importantes tratades tratan l’incuntada é stada la nezescité de aumentè les sinergies cun danter l'Avocatöra popolara y atres istituziuns analoghes dla Provinzia, sciöche por ejëmpl cun le Garant por l’Infanzia y Adolescënza y cun l’Aconsiadëssa por l’Avalianza dles Oportunitês. „Na colaboraziun plü sintida danter chëstes organisaziuns ô dì miorè le sorvisc por le zitadin y aumentè le valûr dles istituziuns“, insciö Kompatscher.
rc
