Robert Musil y la pröma vera mondiala te na mostra a Ćiastel Tirol
„Der Gesang des Todes“ é le titul dla mostra straordinara a Ćiastel Tirol che presentëia la pröma vera mondiala en relaziun ala vita y ales creaziuns leterares dl scritur austriach Robert Musil. L’assessur por i museums Florian Mussner à daurì incö (ai 8 de agost) la mostra sön Ćiastel Tirol, Museum storich – cultural dla Provinzia de Balsan.
„L’aniversâr dl scomenciamënt dla pröma vera é por l’Europa intira n momënt de reflesciun y n oportunité por mët a jì de plü scomenciadies culturales y scientifiches. I avenimënć danter l’ann 1914 y 1918 à albü conseguënzes dramatiches por la jënt laôta che vëgn ilustrades cun chësta mostra“, dij l’assessur por i museums Florian Mussner. Cun la daurida dla mostra a Ćiastel Tirol ciafunse n impuls implü por imparè dala storia y por che le prozès de pêsc devëntes stabil y continuënt, insciö Mussner.
Tratan la pröma vera mondiala ê le scritur austriach Robert Musil (nasciü ai 6 de novëmber dl 1880 a Klagenfurt y mort ai 15 de aurì dl 1942 a Genf) stè stazionè por cater agn sciöche ofizier de resserva tl Südtirol y sön la front tla Talia y tla Serbia. Te chësta perioda ne à Musil nia scrit tröp, al scriô val anotaziuns te so diare, val lëtra y articui por folieć. Chisc cater agn te vera é stà fondamentai impormò do la fin dla vera, dandaldöt por la creaziun dl liber „Der Mann ohne Eigenschaften“.
La relaziun danter le scritur Robert Musil y la pröma vera mondiala é le tema prinzipal dla mostra „Der Gesang des Todes“, che podarà gnì vijitada tl Museum storich-cultural de Ćiastel Tirol ćina ai 30 de novëmber dl 2014. La mostra, curada da Reinhard Wittmann y Karolina Kühn, é organisada te n ordinn cronologich: dal tëmp de scora y de cadët de Musil, al tëmp dl stüde de injinieria y dl sorvisc da soldà, daldô spo le tëmp tratan le stüde universitar de leteratöra y filosofia y le scomenciamënt dles creaziuns leterares.
Do le scomenciamënt dla vera ê Robert Musil jü de süa buna pro i soldas. Sce l’intervënt tl raiun dl Orter somiâ daimpröma plü a n iade en vacanza, ê Musil prësc gnü copè tratan n atach de fligri tla Val Sugana. Tl medemo ann combatô le scritur austriach a Isonzo tles prömes lignes sön la front, tl 1917 s'âl amarè dassënn y tl 1918 êl gnü redatur dl foliet di soldas a Balsan por rové daldô spo pro le comandant Borojevic a Adelsberg/Postojna. Tratan la fin dla vera viô Musil a Vienna.
La mostra, che é stada da odëi tratan l’aisciöda tla Ćiasa dla Leteratöra a Minca, se basëia sön le conzet dla trasmisciun de emoziuns y sön l’esperiënza virtuala dla vita sön la front: cun figöres te na forma de cubs vëgnel fat do le raiun de confin; 14 staziuns acustiches presentëia na pert di tesć de Musil; na seria de registraziuns, documënć, cialzà, mondurs y material da infascè ilustrëia les esperiënzes de vera dl scritur.
La mostra de Ćiastel Tirol, che é gnüda daurida incö, à inće na pert fotografica cun ilustraziuns dla propaganda de vera. Indöt él stè 45 artisć che s’à fistidiè de chësta pert, danter l’ater Albin Egger-Lienz, Artur Nikodem, Hans Josef Weber-Tyrol, Heinrich Told, Josef Durst, Thomas Riss y Franz Ferdinand Rizzi. Le curadù de chësta pert é Carl Kraus.
Presënć incö (vëndres, ai 8 de agost) ala daurida dla mostra „Der Gesang des Todes“ é stà l’assessur por i museums Florian Mussner, le diretur dl Museum de Ćiastel Tirol, Leo Andergassen, le diretur dla Ćiasa dla Leteratöra da Minca Reinhard G. Wittmann y l’espert de musiga y jornalist Karl Corino.
La mostra é da odëi a Ćiastel Tirol ćina ai 30 de novëmber dl 2014.
Informaziuns
Ćiastel Tirol – Museum storich – cultural dla Provinzia de Balsan
Tel. +39 0473 220221 - Fax +39 0473 221132
info@schlosstirol.it - www.schlosstirol.it
rc
