Laboratore fotografich tl Parch natural Fanes-Senes-Braies
Ai 20 y ai 21 de setëmber vëgnel organisé da Pixcube.it y Nikon en colaboraziun cun l’Ofize Parcs naturai n laboratore fotografich tl Parch natural Fanes-Senes-Braies. „Les fotografies“, spliga Renato Sascor, responsabl dl Parch natural Fanes-Senes-Braies „nes mostra la belëza dla contrada y aumentëia insciö la sensibilisaziun por le respet por la natöra.“
I laboratori de fotografia, sostegnüs dala Federparchi (Federaziun taliana por resservać) vëgn pità te parcs naturai te döta la Talia.„Por merit dla colaboraziun cun Federparchi savunse che la cualité dla scomenciadia é garantida y insciö unse inće nos tut la dezijiun da dè nosc sostëgn“ dij Renato Sascor. I responsabli dl Parch natural metarà a jì na escurjiun informativa cun spligaziuns dles particolaritês dla contrada y dla natöra dles Dolomites y dl Parch natural, sciöche inće dl’importanza y di fins dla denominaziun Unesco.
Le laboratore gnarà tignì por talian y vëgn organisé dai 20 ai 21 de setëmber cun esperć chiris fora dala Pixcube y dala Nikon che presentarà la tematica dla fotografia dla natöra sot al aspet dla biodiversité tipica de resservać plü desvalis. Le program y i contignüs dla manifestaziun pon ciafè tlican sön: www.pixcube.it/workshops/parco-fanes-senes-braies-workshop-pixcube-nikonschool-federparchi.html.
La scomenciadia ne é nia ma ponsada por amanć dla fotografia de natöra mo inće por aministradus di parcs naturai. „Les tematiches che gnarà portades dant va adöm cun la sensibilisaziun por le respet dla contrada y alda insciö inće pro nosc laûr“, sotlignëia Renato Sascor. Les fotografies che gnarà fates tratan i dui dis ti gnarà metüdes a desposiziun al Ofize Parcs naturai, magari inće por l’istalaziun de na mostra.
rc
