Irak y Siria: Proieć d'aiüt dla Provinzia diretamënter söl post
Vera, terorism, jënt che mëss s'un sciampè y lascè sües ćiases y abitaziuns: la popolaziun tl Irak y tla Siria é tl zënter de conflić violënć cun conseguënzes tragiches por la jënt sön le post. La Provinzia de Balsan à metü a jì te trami dui i Stać proieć d’aiüt, che dess dandadöt portè aiüt ai mituns y ai jogn de families sciampades dala vera.
„Les imajes che i odun di avenimënć violënć tl Irak y tla Siria é ma n pice avertimënt dles dimenjiuns dles desgrazies umanitares che sozed ti dui Paîsc“, dij le Presidënt dla Provinzia Arno Kompatscher che sotlignëia, che dandadöt mituns, ëres y mendranzes etniches y religioses é indô le perts che vëgn colpides le plü dales conseguënzes dla violënza. La Provinzia colaborëia insciö cun assoziaziuns sön le post tres proieć de cooperaziun al svilup por dè n aiüt finanziar y de colaboraziun dandadöt ai mituns y ai jogn de families sciampades dala vera.
Insciö él gnü finanzié cun 31.000 euro n proiet de svilup tl Nord dl Irak, cun chël che al vëgn costruì strotöres por l’assistënza de jogn a Bashika y Bakhdada. I frabicać dess dè assistënza a porsones sciampades dala vera, danter chëstes dandadöt grups y families dles mendranzes de religiun cristiana, di Curdi, di Yazidi (mendranza religiosa de lingaz Curd) y dla Palestina. La realisaziun dl proiet sön le post vëgn organisada cun le sostëgn de „Un ponte per…“, assoziaziun de volontariat por la solidarieté internazionala.
Tla Siria sostëgn la Provinzia cater tliniches sot tera y öna na scolina sot tera. Le sostëgn dla cooperaziun al svilup por chësc ann é de 90.000 euro, cun chi che al vëgn inće finanzié marćianzies da vigni dé por 240 families. Implü vëgnel sostegnü 2000 viadus cun polber de lat y sorvisc d’assistënza psicologica por mituns che laora sö les esperiënzes de vera. Cun le sostëgn dal Südtirol él inće preodü la realisaziun de na sartoria.
I proieć de aiüt tla Siria vëgn organisà dala Provinzia adöm cun les organisaziuns „Syrian Children Relief" (SCR) y "Ai.Bi. Amici dei Bambini" (trames döes à les sëntes a Balsan). L’organisaziun SCR é bele ativa cun aiüć tla Siria da de plü agn y sostëgn dandaldöt orfani de vera, mo pîta inće assistënza sanitara sön le post cun l’intervënt de doturs dl Südtirol (doturs en pert inće de proveniënza dala Siria).
rc
