Centenà dla Pröma Vera Mondiala: La Consulta Ladina mët a jì dui proieć
Teatri scolastics y n concurs artistich: döes é les scomenciadies che la Repartiziun Cultura y Scora Ladina metarà a jì, adöm cun la Consulta Provinziala por le grup linguistich ladin, por l’aniversar dl scomenciamënt dla pröma vera mondiala tl 1914, che à portè cun l’ingrès te vera dla Talia tl 1915 a combatimënć amesa les Dolomites. Tl zënter dles scomenciadies saràl i scolars y i artisć.
Cun le mëteman dl ann scolastich nü gnaràl metü a jì en colaboraziun cun les scores dles valades ladines proieć teatrai che arà sciöche tematica zentrala le centenà dla pröma vera mondiala. Chësta dezijiun é gnüda tuta dala Consulta Ladina che s’à abiné da püch. „L’idea é chëra da orëi aumentè la conescënza storica di jogn y di scolars y da ti dè la poscibilité da se confrontè cun na perioda dla storia dër dolorosa por l’Europa y por l’umanité“, dij l’assessur por la scora y cultura ladina Florian Mussner che sotlignëia che „i azënć dla scomenciadia é dui: da öna na pert orunse svilupé inant la conescënza storica di scolars y dles scolares, y dal’atra pert orunse cherié cun l’inserimënt dl program tla plataforma online dl’Euregio n cheder coletif y interatif de spligaziuns y recordanzes danter Südtirol, Trentin y Tirol che mët les fondamëntes por n dagnì che nes liëia plü adöm y che nes despartësc nia.“ La storia y les esperienzes di soldas y dla popolaziun tratan la Pröma Vera Mondiala gnarà analisà tolon en conscidraziun trëi aspeć: l’influënza dla vera sön l’ambiënt (por ejëmpl strades, ferates, teleferiches), l’influënza dla vera sön la sozieté y l’influënza sön la singola porsona. I proieć teatrai, che gnarà laurà fora tratan l’ann scolastich gnarà spo presentà tla secunda pert dl ann scolastich, tratan le 2015, che é l’aniversar dl centenà dl ingrès te vera dla Talia y dl scomenciamënt di combatimënć sön la front dolomitica danter la Talia y l’Impêr Austro-Ungarich.
La secunda scomenciadia, tres en recordanza dl centenà dl scomenciamënt dla vera, é n concurs artistich a pesć metü a jì dala Repartiziun Cultura Ladina y valuté positivamënter dala Consulta Ladina. „La tematica zentrala sarà la relaziun danter la vera y la pêsc te n contest europeich che gnarà organisé adöm cun le „Südtiroler Künstlerbund“, spliga l’assessur Florian Mussner. Le proiet é ponsè dandaldöt por artisć ladins, inće fora di confins dl Südtirol. Les modalitês y informaziuns plü avisa sön le concurs gnarà tosc comunicades.
La Consulta Ladina à aprovè inultima ot contribuć por ativitês culturales y nü contribuć por investimënć culturai.
rc
